Bomca

(hikäyä)
Bu kız kaydan kilep çıkkandır, soraşuçı, kızıksınuçı bulmadı. Ul komlı mäydançıktagı keçkenä eskämiyädä utıra da utıra. Başkalar uynıy, çır-çu kilä, ä bu utıra. Şundıy sabır, tınıç mikänni? Östendä ozın gına külmäk, yaña çagında matur bulgan, küräseñ, häzer inde töse uñgan. Ber oyıgınıñ tubıgı yamalgan, ayagında katı tabanlı arzanlı sandalilär.

Bişär katlı berniçä yort urtasındagı ihatada malaylar tup suga. Kıznıñ küzläre şunda. Läkin ul uynarga teläven berniçek tä beldermi, anı çakıruçı da yuk. Ber genä keşeneñ dä anarda eşe yuk. Kaydandır kilgän, dimäk, kaydadır kitep olagaçak. Läkin kız kön sayın kilä başladı. Kilä dä utıra. Endäşmi. Başkalar da aña süz däşmi. Kemneñ häyerçe belän söyläşäse kilsen inde. Ä kız utıra. Kımşanmıy. Gacäp. Un yäşlek bala kuzgalmıy säğatlär buyına utıra alsın äle. Tik küzläre genä tupka iyärep yöri. Kinät şul tup uynauçılarnıñ kulınnan ıçkınıp kitte häm tägäräp kilep bala karşında tuktadı. Kızıkay yalt itep sikerep tordı, kulları tupka ürelde, läkin totınmadı, keşe äybere, açulanırlar, ärlärlär, tukmap cibärüläre dä bar.

- Äy, bomca, närsä katıp kaldıñ, ırgıt tizräk! - dip kıçkırdı olırak malay.

- Kız tupnı alıp uyınçılar yagına ırgıttı. Ul üzenä “Bomca” dip kıçkıruların işetmägän kebek, kuşkannı eşläde dä, yänä urnına barıp utırdı. Tik anıñ öçen dönya häzer az gına üzgärde, märhämätleräk buldı, şikelle. Nindider kuanıç çatkısı kabındı. Häzer inde ul bu ihataga yukka yöremi, anıñ maksatı bar, tup tägäräp kitsä, cähät kenä ala salıp malaylarga birep tora. Yakın barıp tügel, yıraktan gına ırgıta, şulay da bähet. Şuşı kıska gına mizgel eçendä bulsa da ul çın tup totıp karıy bit. Atalı-änile malaylar, rähät yäşägän malaylar, bähetle malaylar totkan tupnı tota! Alar yäşägän tormışka yakınaygan kebek bula.

- Äy, Bomca, tizräk bul! - digän boyırık yañgırıy. Kız ber genä sekundka kulına çın tup totıp karavınnan da kanäğat. Läkin anıñ tupnı cirgä bärep karıysı da kilä. Niçek sikerä ikän? ä uynavı bigräk tä kızıktır inde. Yuk, bala tupnı cirgä bärep kararga kıymıy, yugıysä arkañnan yodrıklap häzer monnan kuaçaklar. Podezd karşında utırgan äbilär, nihayät, bu kız turında söyläşüne iğtibarga layık eş dip taptılar. Kaydan kilep çıktı soñ äle bu bahırkay, kem balası? äbilär küpne belä, kön buyına diyärlek şunda utıralar bit. Kemgä kunak kilgän, kem avılga, kem yalga kitkän, kiyäügä çıkkan, bala tapkan, ayırılıp kaytkan häm başkalar. Belmäskä ni, ber äbi belgänne barısı da belä, ä barısı belgänne härkaysı belä. Tik, ni gacäp, bu kıznı tanuçı tabılmadı.

Kızıksınu – zur köç. Karçıklardan beräüse kesäsen kapşıy, ähä, yomşak känfite bar ikän. "bi kız yanına kilä häm anı söyländermäkçe bula.

- Balam, bik tämle dip känfit satalar ide, aşap kara äle, çınlap ta tämleme ikän, - dip ul kızga küçtänäçen suza. Tik anısı sikerep torıp, küz açıp yomgançı kaçıp kitä. Güyä urmanda üskän bolan balası. Äbi-çäbi bu kılanışka gacäplänep karap kala.

Kız irtägäsendä yänä urnında ide. Elekkeçä malaylarnıñ uynauların küzätä. Şulay könnär uzdı, keşelär bu yat kızga künekte, bersenä dä komaçaulamıy bit. Barı tik yortta ara-tirä: “Bomca, kiterep bir! Bomca, cähäträk bul!”- digän kıçkırular gına işetelep kala ide.

Ä ber könne kız yılap utıra, imeş. İñ berençe moña Fatima apa iğtibar itte.

- Kızım, nilektän yılıysıñ, ni buldı? - dide ul bala yanına kilep.

Bu yulı kızıkay torıp yögermäde. Kurku katış ömet çagılgan küzläre belän Fatimaga kütärelep karadı.

- Berär cireñ avırtamı ällä? - dip soradı tüti kabattan, kıznıñ endäşergä baznat itmäven añlap.

- Kolagı-ım! - dide kız sıkrap, bu anıñ şuşı ihatada äytkän berençe süze ide. Fatima hätta şatlanıp kuydı: “Bäräqalla, çukrak ta, telsez dä tügel bu bala”.

Tüti keşe, kıznıñ yaulıgın çişep, sak kına kolagın karadı. Ul kızıl häm şeş ide. Fatima öyenä aşıktı, tizräk avırtunı basa torgan daru tabası ide. Kiräk çakta bulamı ni ul...

Daru kürşedän tabıldı. İke hatın kıznı fatirga alıp kerep preparat eçerdelär, kolagına aloe kuyıp bäylädelär. Tik, kıznıñ küzlärennän barıber tuktausız yäş aga ide. Kürenep tora, bala ütä tüzemle, tavışın da çıgarmıy, tik kolagı sızlavı anıñ miyenä bärä, şuña tıyıla almıy yılıy. Ni eşliseñ, hatınnarga aşıgıç yärdäm çakırırga turı kilde häm Fatima kıznı ozata kitte.

- Yä, isemeñ kem äle sineñ, matur kızım, - dide doktor, balanı karaganda.

- Nursibä, - dide kız çak işetelerlek itep.

- Ä familiyäñ?

- Zakirova, - dip nigäder üz familiyäsen äytep cibärde Fatima tüti. – Zakirova bezneñ familiyä.

Kız endäşmi kaldı. Aña barıber, tik avırtu gına azrak basılsın ide...

Dävahanädä karalıp, tabiblar bilgelägän protseduralar algaç, kıznıñ häle yahşıra başladı. Fatima mediklarnıñ kiñäşlären yazıp algannan soñ, kıznı citäkläp kaytırga çıktı. Öyendä ul iñ täüdä balanıñ tamagın tuydırdı. Şunnan: “Kızım, bügen kaytıp yöremä inde, mindä genä kal,”- dide.

Fatima ozak kına yoklıy almıy yattı. Kem balası bulır bu? Ata-anası yukmı ällä? Alay disäñ, kiç buluga kaytıp kitä, dimäk, kunar cire, yortı bar. Häyer, andıy ata-ananıñ buluınnan bulmavı... Täübä, täübä, başka nindi uylar kilä. Kemeler bar bit bu balanıñ, tik üzeneñ genä qadäre yuk, şikelle. Bulmasın. Monnanarı Nursibä üzemdä kalır. Ägär teläsä... Telärme ikän? Yarıy, küz kürer äle, barısın da aldan belep bulmıy, ni bulsa şul bulır. Bälki, änkäse berär eçkeçe bulıp, kızın onıtıp ta kuyar. Şulay üz-üzen ömetländergäç, Fatima yoklap kitte.

Nursibä ikençe könne kiç kaytıp kilergä uyladı. Läkin şunnan soñ ul Fatima yanında yış kala başladı. Ällä änise riza buldı, ällä kız anardan röhsät sorap tormadımı – monısı Fatimanı kızıksındırmadı, yanında şuşı kız bulsa, ul şuña artıgı belän kanäğat.

Ber könne yämsez tavış çıgarıp kıçkırınuga barça yort siskände.

- Sin kayda çukınıp yöriseñ? Min bit sine şişä cıyarga cibärgän idem.

Karasalar, sälämä genä kiyengän iserek ber biçä bakıra, imeş. Üze Nursibäneñ kulınnan tarta. Bu hälne kürep Fatima tışka atıldı.

- Sez bu kıznıñ äniseme ällä?

- Bulsa ni, sineñ nindi eşeñ bar!

- Äydä, utırıp yahşı gına söyläşäbeҙ.

İnde küptän yünle keşe belän yünle süz söyläşmägän hatın beraz yugalıp kaldı bulsa kiräk. Alkogolizmnan isärgä äylängän miye belän närsäder uylagan buldı, şulay da rizalaştı. İke hatın säğat yarımlap vakıt Fatimalar fatirında yugalıp tordılar. Menä ber zaman podezdda eçkeçe hatın, anıñ artınnan hucabikä kürende.

- Kileştek, - dide ul eskämiyädä anıñ süzen kötep utırgan ahirätlärenä. – Nursibä mindä ҡala.

Bolarınıñ yözläre yaktırıp kitte.

- Niçek ul alay? Soñ, kız bala – yärdämçe bit ul. Östävenä, posobiye-alimentı da bardır.

- Häzer ike posobiye alır inde.

- Niçek?

- Meñ sumғa kileştek. Nursibä mindä yäşi, ä min şunıñ öçen änisenä meñ sum akça birep torırga tiyeşmen.

- Ästägıfirulla! - dip kuydı ber apa, ä başkalar ni äytergä dä belmädelär. Tik Fatima alarga ozaklap yañalık “çäynäp” torırga irek birmäde.

- Beläsezme närsä? - dide ul yuramal tökse tavış belän, - balakaynıñ kiyemnären kürdegez, şulay bulgaç, biredä tel çarlap utırmagız, marş öyegezgä!

Äye, Fatima üzeneñ ahirätlärenä komanda birergä haklı ide, alar karşında bügen yalgız apañnıñ abruyı bik yugarı kütärelde. Ä tegelär nigä monı başta üzem uylamadım soñ äle, dip härberese üzen bitärläp, kem nindi citezlektä buldıra ala, tert-tert kilep öylärenä yögereştelär. Bu könne Nursibä ber koçak kiyemle buldı, başlıktan alıp kışkı botinkaga qadär bar ide, kaysıber kiyemnär hätta ör-yaña. Hatın-kız bala digändä şulay inde, yomışnı arttırıp ütädelär – matur-matur uyınçıklar, iñ tämle rizıklar alıp kilgännär. Östävenä, Fatimaga kat-kat: “Sin bezgä äyt kenä, närsä kiräk - tabarbız, bulışırbız, bergäläp üstererbez”- dip toralar. Ä Fatima “bähetle kartlıҡ” kiçerä ide. Çınlap ta, yanıñda bala bulsa, anıñ öçen can atıp yäşäsäñ, kartlık ta bähetle bula ikän ul.

Köz citte. Fatima Nursibäne citäkläp kibettän kibetkä yörede, menä digän kiyem, portfel, kitap-däftär aldılar. Nursibä şat ine.

Tik şunısı gına yaman: Bomca tigän kuşamat mäktäpkä dä iyärep kilde. Sıynıftaşları anı tiñ itmäde, kızlar anıñ belän duslaşmadı, söyläşmi yöredelär, ä malaylar ürtäşä ide. Häyer, ikele kapçıgı belän kem duslaşsın inde. İh, şul ikelelär! Moñaça Nursibä çınlap torıp ukımadı şul, vakıtı şişä cıyıp uzdı. Ä ul naçar bilgelärdän kotılıp buladır bit?! Sası öy, iserek anadan anı yazmış kotkardı, ä ikelelärdän kotılıp bulmıymı? Soñ, bu bit kıznıñ üzennän tora!

Nursibä kitap cıydı. Kaysın kibettän satıp aldı, kaysın kitaphanädän taptı. Matematika, ädäbiyät, fizika, himiyä, tarih fännnäre buyınça barlık klasslar öçen däresleklär cıydı, şularnı ukırga utırdı. Köne-töne ukıdı. Şunısı yahşı, berkem dä komaçaulamadı, berüzenä ber bülmä bit, Fatima anı üz irkenä kuydı, yahşıga omtılgan balaga kem karşı töşsen.

Bermälne Nursibägä himiyä ukıtuçısı “dürtle” kuydı. Klass moña älläni ähämiyät birmäde. Näq uyın mäydançıgındagı kebek kilep çıktı, anda tup totarga röhsät itälär ide bit, monda da şulay, äydä, Bomca da ber märtäbä “dürtle” alıp karasın, bezneken almıy bit dip uyladılar. Tik sabaktaşlar yalgıştı. Berazdan Bomca tagı da “dürtle” aldı. Şunnan soñ tagı yışrak häm törle fännär buyınça yahşı bilgelär ala başladı. Annarı inde kıznıñ köndälegendä yañarak kına zur şatlık bulgan “dürtlelär” urnına “bişlelär” ürçi başladı. Ä cidençe klassnı kız bik yahşıga tämamladı. Bigräk tä ul himiyä, biologiyä fännären su urnına eçä ide.

Ana şulay vakıt ütte. Fatima kanäğat ide, yanında yakın keşese bar häzer. Akça citä: pensiyä yarıysı gına kilä, östävenä härbi diñgez flotında ofitser bulıp hezmät itkän Firuz ulı da cibärep tora. Şuña meñ sum bolar öçen zur yugaltu tügel ide.

Meñ sum digännän, ber könne “posobiye” alırga tege hatın kilmäde. Tagı da berniçä kön kötte Fatima, tik yukka. Eçkeçe hatınnıñ akça almıy yörüe ğadäti häl tügel, ällä ber-ber bälagä tarıdımı ikän...

- Kızım, - dide Fatima Nursibägä, - äniyeñ küptän kilergä tiyeş ide, yuk ta yuk. Barıp hälen belep kilikme ällä?

Erak yäşämägän ikän Nursibäneñ üz anası. İkençe uramda gına. Tik monda büränädän buralgan avıl öyläre. Fatima belän Nursibä kapka baganaları kıyşaygan bäläkäy genä ber yortka kilep kerdelär. İşek biksez, idännärneñ taktası kürenmi, küptän inde ayak kiyemenä elägep tıştan taşılgan balçıkka kümelgän. Sası is. Timer karavatta iske yurgan yabıngan hucabikä yata, ayagındagı itegen dä salmagan. Fatima anı uyatmakçı bulıp yakın kilsä, hatınnıñ avızına çebennär kerep-çıgıp yöri, imeş. Nişliseñ, Nursibäneñ anasın Fatima üz akçasına cenazaladı. Şunnan soñ inde kıznıñ kaydadır kitü mömkinlege bette, kemneñder anı kaytarırga tırışıp yörü ihtimallıgı da kalmadı. Bu häl ike can iyäsen tagı da yakınayttı şikelle. Berkönne Fatima kıznı ikmäk alırga kibetkä cibärde, ä ul ike buhanka kütärep kaytkan. İşektän kergändä ük üze bolay söylänä:

- İke ipi aldım inde, änkäy, irtägä ukudan soñ mäktäptä tantsı bula, ölgerä almam dip uyladım.

Fatimanıñ yörägenä sarı may yaktılarmıni, küñele tulıp kitep, urındıkka utırdı. Ana şul “änkäy” digän süzne niçä yıl kötte bit ul. Här kön, här minut sayın kötte. İnde häzer buy citkerep kilgän kız bit, äytmäs inde, sabıy tügel şul, yakın itä almıy, dip uylagan ide. Menä, Hodanıñ hikmäte, sabır itsäñ moradıña ireşäseñ ikän bit. Dimäk, bala ike hatınga beryulı “änkäy” dip äytä almıy yöregän. İ, biçara.

Äye, kız üskän sayın nıgrak açıla töşte. Törle kiçälärdä, kontsertlarda bik teläp katnaştı. Şulay bulmıy, çitkä tibelgän üksez bäpkä güzäl akkoşka äylänep bara ide, şuña da kollektivnıñ urtasında buldı. Ä Bomca dip ürtäü, kimsetü disezme?

Kıznıñ küze ber yegetkä töşte. Tafil ike klasska ölkänräk ide. Ozın buylı, kiñ cilkäle, diñgezçelär şikelle çaykalıp atlıy, hiçkayçan kurtka töymäsen kaptırmas, avızda sagız, kara küzlek, kesädä kıymmätle sigaret belän mobilnik. Söyläşüe disäñ, üzennän keçelärgä irenep, mıskıllap kına endäşä, süzlären yünläp äytep tä betermi. Yänäse, kiräk bulsa añlagız, añlamıy torsagız yodrık ta bar äle monda. Şuña ğaşıyq buldı, şikelle, Nursibä. Yeget tä anı kakmadı. Sıra ise añkıtıp diskotekaga kilep kersä, Nursibäne tantsıga çakırıp ala. Menä şunnan soñ Nursibägä Bomca diyüçelär azaya başladı. Çönki äytkän berse tübäsendä Tafilnıñ tos yodrıgın tatıp karadı. Şulay tönboyık belän tigänäk duslıgı dävam itte, yeget ukuın tämamlagaç ta bolar oçraşkalap yöredelär.

Kötmägändä Fatima telegramma aldı. Menä şatlıҡ. İnde niçä yıl kürenmägän ulı Firuz otpuskaga kayta, imeş. Citmäsä, hatını, ulı belän. Bu häbär Fatima fatirınıñ astın öskä kiterde: yuınu-agartınu, kelämnär kagu, ällä nindi aşamlıktar peşerü – hay mäşäqatle häm kızık ikän ul kunak kötüe.

Fatimanıñ onıgı Alsaf Nursibä belän ber yäştä ikän. Alar tiz arada urtak tel taptılar, soñınnan hätta berniçä tapkır kinoga, diskotekaga da barıp kildelär. Kız belän yegetneñ duslaşuına ğailädä berkem dä karşı kilmäde. Tik sanaulı kön tiz ütä. Firuznıñ da otpuskası bette. Şunnan soñ inde moña tiklem ifrat häybät, kotlı tormış buşap kalganday buldı, güyä kemder citmi kebek. Yağni, kemder monda yäşärgä tiyeş kebek, ä ul yuk. Fatima ulı belän onıgın sagınsa, Nursibä dä Alsafnı yuksına sıman. Bälki, bu börelänep ölgermägän yäşlek mavıguı gınadır, kem belä, kul seltäp onıtıp kuyuıñ yahşıraktır. Çönki Alsaf yırakta yäşi, moña qadär un yıl kaytmagannar, ällä yañadan un yıl kaytmaslar. Ä menä Tafil yakında gına. Anıñ belän telägän sayın oçraşıp bula. Şuña, kaydadır yörep kaytkan yeget kıznı tugan könenä çakırgaç, barmıym dimäde.

Fatima kızınıñ kinät üz eçenä yomıluın, kemgäder üpkä saklavın sizde, älbättä. Sizmäslekmeni, säğatlär buyına süzsez utıra, kımşanmıy da, näq tege çakta yorttagı eskämiyädä utırgan kebek. Tik ana rolenä däğva itkän hatın küpme genä töpçenmäsen, kızı ser çişmäde. Ä mäktäpne tämamlap attestat algan köndä Fatimanı tämam aptırattı,

- Änkäy, min Mäskäügä kitäm, - dide ul kinät.

- Ä?! Niçek, kayçan, nindi institutҡa?

- İnstitutҡa tügel, eşlärgä.

- Bäy, eşne bezdä tizräk tabarga bula. Tik, siña ukırga kiräk, attestatıñda gel bişle, niçek bulsa da institutҡa kerergä kiräk siña.

- Min ukırmın. Tik ber stipendiyägä yäşäve avır, şunıñ öçen beraz akça eşläp kaytam.

Fatima kızınıñ närsägä bolay kılanuın añlamadı, ukırga ker, akça yagınnan üzem bulışırmın, dip küpme genä ügetlämäsen, Nursibä anı tıñlarga da telämäde.

- änkäy, süzeñne äräm itmä, min irtägä kitäm, - dide dä kuydı.

Ber yıldan, äytkän väğdäsendä torıp, kaytıp ta töşte. Kız tämam köyäz tutaşka äylängän, Mäskäüçä kiyengän. Fatima aña karap soklanıp tuya almadı, tez başı yamalgan iske kolgotkilı kızdan şundıy hanbikä çıgar dip kem uylagan. Tik kızı öydä ozak utırmadı, meditsina institutına ukırga kerde.

Altı yıl cay gına ütte dä kitte. Ä menä şunnan soñ ber-ber artlı ike vakıyga bulıp aldı. Alsaf, ätise kebek ük, härbi uçilişe tämamlagan, beraz hezmät itep tä ölgergän ikän, häm kötmägändä biredäge härbi komissariatka eşkä kilep urnaşkan. Bu hälgä Fatima söyenep kenä yöregändä, Nursibä dä ukuın tämamlap şähär dävahanäsendä tabib bulıp eşli başladı. Fatima bähetle ide, tik ul haman da kanäğat tügel äle, bähetneñ tagı da zurıragın kötä. Şuña ömetlänergä nigez dä bar. Alsafnı kür sin, kartinäsendä yäşämiçä ällä kayda fatirda tora. Hätta Nursibä ukuda çakta da monda yäşärgä telämäde, ber säbäbe bardır bit? Yugıysä, Nursibä Fatimanıñ kızı, Alsaf onıgı, öydäş bulu alarga yazıkmı. Tik Fatima bar küñele belän Nursibäne kızı dip kabul itsä dä, çınbarlıkta ul barıber yat kan bit. Dimäk... Monı yäşlär üzläre dä bik yahşı añlagan, şikelle, añlagan häm ber kararga kilgän. Yarıy, alarnıkınça bulsın, ber öydä yäşär könnäre alda bulsın.

Fatima şulay uyladı. Alsaf ta Nursibä belän oçraşu ezläde, yulına çıgıp tordı, kinoga, kafega barırga çakırdı. Tik, menä gacäp, Nursibä yegetkä karata salkın ide. Tege vakıtta yöräktä yaralgan hislärneñ dörläp kitüen telämi ideme, gel çitläşte.

... Bu narkomannı inde berniçä atna dävalıylar. Tege dönyaga çak kitmi kaldı. Häzer inde üz akılında, söyläşä, keşe äytkänne añlıy, dimäk, vakıt. Nursibä avıru yanına, koyka çitenä kilep utırdı.

- Yäle, akıllı yeget, ciñeñne sızgan, tagın ber ukol kadap alıyk äle!

Yäş tabibnıñ kulı kaltırap kuydı, läkin ul üzen tınıçlandıra alıp “eşen” dävam itte. Beraz tın utırıp torgannan soñ, ul basınkı vä ifrat tınıç tavış belän narkomanga endäşte:

- Sin mine tanıysıñmı?

- Täkäbber yeget kızga sınabrak karasa, küptänge tanışın kürep gacäplände. Gacäplänerseñ dä, elekke bomca iskitkeç sılu primadonna bulgan läbasa!

- Nursibä?! - dip soradı ul, haman da ışanıp citä almıyça.

- Äye, min Nursibä, ä sin – kabähät. Tege vakıtta sin mine harap itteñ, ä bügen – min sine. Min siña agu kadadım, ber-ike minuttan üläçäkseñ.

- Nursibä-ä...

- Sineñ öçen min Nursibä tügel, sineñ öçen min yılan. Äye, astırtın çaga torgan yılan. Mäktäptä ukıganda uk min himiyä öyrändem, soñınnan barı tik sine agularga öyränü öçen genä altı yıl meditsina institutında ukıdım. Menä buldı, niyätemne ütädem, eşeñ bette...

Nursibä beraz gına Tafilga karap tordı. Anıñ kurkudan kiñ açılgan küzläreneñ pıyalalana başlavın kürgäç, yänäşädäge koykada yatkan avıruga iğtibar itmi, işekkä atladı.

...Sudya prigovor ukıy. Nursibäneñ medik buluı, yağni keşelär sälamätlege sagında torırga tiyeşle bulıp ta başkalar gomerenä kul suzuı, Gippokrat antın bozuı, üzen yaklarga mömkinçelege bulmagan avırunı üterüe, häm dä kilep yavız eşen aldan uylap salkın kan belän başkaruı, yağni ayıruça rähimsez eş itüe – barısı da iğtibarga alıngan. Şuña da hökemdar barlık maddalärne kuşıp gomum sroknı äytkäç, küplärneñ yöräge özelgändäy buldı.

Sud tämam. Nursibä konvoy ozatuında zaldan çıgarga yünälde. Läkin, kinät tuktap artına kayırıldı häm küzlären Alsaf yagına yünältte.

- Min sine yaratam, Alsaf.

Tıp-tın zalda bu tavış ayırımaçık yañgıradı. Gomer bakıy naçarlık häm zakon süzläre genä işetkän bina öçen bu avazlar säyer işetelde. Läkin şunda uk cavap äylänep kayttı.

- Min dä sine yaratam. Min sine kötärmen, Nursibä. Sin nık bul!

Kız aldındagı kara işekkä taba atladı, anıñ ike bite buylap yänä tavışsız gına küz yäşläre tägäri ide. Tormış digän närsä anıñ öçen bette, özelde, ahrısı. Läkin üzsüzle kız canı-täne belän bulsa da köçänep üzen bähetsezgä sanamaska tırışa ide. Ul keçkenä çagında bay balaları totkan tupnı totıp karadı, baliğ bulgaç azga gına bulsa da mähäbbätne tatıp karadı, institut tämamladı. Dimäk, millionlagan halık niçek yäşäsä, ul da şulay yäşäde. Dimäk, ul bomca tügel, ul başkalar kebek ük keşe, anıñ başkalardan kim cire yuk. Yuk, ul bomca tügel. Tügel!..


Click or select a word or words to search the definition