Ber ğaşıyqnıñ süzläre

Min anıñ aldında çakta, ber minut itmim äräm,
är eşen, härber töşen ber-ber küzemnän ütkäräm.

Moñlı bulsa — min dä moñlı, şat ikän ul — min dä şat,
Min anıñ aldında çakta, cömlä[2] häsrättän azat.

Teşlären ber kürsätep kölsä, tirä-yak yaktıra,
Ul kölä, kölgän sayın, ul ber maturlık arttıra.

Çın maturlık mänbägı[3] ul, çın mähäbbät çişmäse,
Cirgä yañlışlık belän töşkän ber ocmah çäçkäse.

Köndezem tönnän karañgı, ul yanımda bulmasa,
Kükrägemdä ut ta yanmıy, ul kölep yandırmasa.

Ul mäläkne[4] kürmi kalgan könnäre avıru bulam,

Min añar yögräm, kürim dip, kanlı bäğrem sızlasa.

Äylänämne kaplap algan kap-karañgı ber bolıt,
Östemä yaktı töşermi, ul «koyaş» yaktırtmasa.

Kayvakıt häsrät yozagı berlä küñlem biklänä,
Şul yozaknı göl kebek kerpek belän tik «ul» aça.

Moñlı küñelem östenä ul küz nurın yaudırdisä,
Şatlanam min; şatlıgımnan can yanıp kükkä aşa.

Göl bitennän ber genä üpsäm kızu irenem belän,
Bar vöcüdemne ilahi ber mökatdäs nur basa.

Avızı käüsär[5], tökrege abelhäyättan[6] tämleräk,
Tik şunıñ berlän genä ülmi tora yangan yöräk.

Bu şiğırlärne yazam min moñlanıp häm şatlanıp,
Şul söyeklemneñ ike zur küzlärennän nur alıp.

Encelär ezläp çumarga ul gına tik yul aça,
Bu şiğırneñ ber yulı bulmas ide, ul bulmasa.

Ul — kanatlangan fireştä, ul miña ilham birä,
Min sulıp betkän bulır idem — fäqat ul can birä.

Ence tösle bu şiğırlärne yazıp, rättän tezim,

Ul söyeklemneñ matur muynın şunıñ berlän bizim.

_________
[2] Cömlä — barça.
[3] Mänbeğ çıganak.
[4] Mäläk — färeştä.
[5] Käüsär — ocmahta şirbät çişmäse.
[6] Abelhäyät — mäñgelek suı, tereklek suı

Click or select a word or words to search the definition