Baş Kına İsän Bulsın!

(yumoreska)
Cämäğat! Minem teşlärem keçkenädän ük naçar buldı! Soñgı dürtesen küptän tügel sugıp töşerdelär. Äy, cämäğat! Ni genä disäñ dä, teşsez keşe - yämsez inde ul! Kölmäskä kiräk! Kölmäskä kiräk!

Äy, kayber keşelär kölgän bula, äy, şarkıldagan bula, äy, avızın yırgan bula. Ä üzläreneñ aşkazanı kürenep tora. Yazvası-niye belän. Kölmäskä kiräk!

Bezdä teşlärne kuydıru - problema, şul! Üze mäşäqatle, üze kıymmät. Bezdä alarnı aldıru gına ansat. Ägär dä inde bolnitsalarda yörep, çiratlarda integäseñ kilmäsä, berär kibettä berär närsägä çirat torganda berär tazarak cegetkä avırrak süz äytsäñ, eh digänçe suga da töşerä! Döres: narkoz da, çurt ta kiräk tügel - suga da töşerä! Familiyäñnı da sorap tormıy. Tik şunısı bar inde: sukkan çakta sızlagan teşeñne yodrık turısına kiterep ölgerergä kiräk!

Yuk, cämäğat, ni genä dimä, teşsez keşe - yämsez inde ul! Menä satuçılar, säüdä rabotnikları arasında profilaktika eşen alıp barırga kiräk. Menä sezneñ iğtibar itkänegez bardır, äyeme: kayber satuçılarnıñ avızları altın teş belän tulgan bula. Şulay bit? Dimäk, alarga vitamin citmi. Şuña kürä alarnıñ teşläre tizräk çeri, bozıla, häm alar yasalma teşlär kuydırırga mäcbür bulalar. Ällä ul satuçılarnıñ teşläre telläre äşäke bulganga şulay tiz bozıla mikän, äy? Ey, kayvakıt satuçılarnıñ avızınnan şundıy süzlär çıga!.. Ästäğfirulla, canım! Andıy süzlär çıkkan avızda teşeñ genä tügel, ällä närsäläreñ çerer äle!

Annan soñ, teşsez bulunıñ uñay yakları da bar inde üze. Äytik, menä avızları altın belän tulgan keşelär niçek kurıkmıyça tönlä Kazan uramnarında yörilär ikän? Yuk, niçek kurıkmıyça tönlä Kazan uramnarında avız tulı altın belän yörergä mömkin? Moña minem zihenem citmi! Bu minem başıma sıymıy! Ällä soñ alar keşe talauçılarda kläşşä, ploskogubtsı yuk, dip uylıylar mikän, äy?

Eh, teşeñ bulmasa, canıñ tınıç! Teş pastası da kiräk tügel! İrtä belän ışkıp azaplanası da yuk! İt aşagaç, çıra belän teş arasında kayızlıysı da tügel! Häm berkayçan teşeñ sızlamıy!

Menä, kayber iptäşlär belä torgandır: dönyada iñ katı avırular - teş sızlau häm pohmel. Änä, kayber cegetlär mine añladı! Şulay: teş sızlau häm pohmel. Menä: ni ülmiseñ, ni tere tügel. Avızda teşlär bulmasa, telgä rähät! İrken! Şundıy irken inde menä: teleñ laç-laç kilep, ber añkaudan ber añkauga barıp butalıp tik yöri. Şundıy irkenlek! Ägär irennäreñ bulmasa, teleñ avızıñnan oçıp kitär ide şikelle!

Uramda banditlar oçrasalar da, rähätlänep, avızıñnı yırıp, yılmaep cibäräseñ, böyereñdäge taşlar kürengänçe: avızında teşe, kesäsendä akçası, başında miye bulmagannarga timilär alar. Äle bervakıt şulay keşe talauçılar üzläre miña biş sum birep kitkännär ide!

Döres inde anısı: avızda teş bulmagaç, beraz sügenergä caysızrak. Kayber süzlär slabıy çıga. Bigräk tä, tege - “s” härefennän başlangannarı. Häyer, anıñ başka härefkä başlangannarı - vot, da çurta!

Äytäm bit, cämäğat: teşlär - çepuha! Baş kına isän bulsın. Gaziz baş isän bulsın!

Click or select a word or words to search the definition