Barısı Da Sovetski

Dönyanıñ, dim, äy, ber genä dä räte-çiratı kalmadı häzer, ä! Närsägä genä barıp totınma, barısı da sovetskigä äylänep bette.
— Hatın-kızı, balası-çagası, tuyı-teşeme — barısı da sovetski. Ul yaña çıkkan sovetski koyrıksız häreflärne söyläp tä torası yuk inde, bötenläye tege koyrıgın kıskan et tösle bulıp kalgan, mimläre öçen sin oyalasıñ...
— Çın bulsa, äle häzer möfti häzrätläre üze dä hacga bargandagı ozak yul azabı, säfär mäşäqatlärennän soñ, sovetskiräk bulıp kitkän imeş, di. Belmässeñ, bu yıldagı möftilärdän bulır da...
Anısı inde (möftisen äytüem) çurt esnim,— soñgı könnärne menä äle üzem dä niçekter sovetskilänep baram. Primer, berkön şulay irtägä comga diyäse könne, säğat öçtän ük kibetne yabıp kayttım. Öygä kaytkaç tärät alıp, öyläne ukıp yata idem. Anası kilgän:
— Bulmasa, kart, bügengä namazıñnı sovetçarak itep, annan-monnan gına ukıp taşla! — di. Pilmän suına, imeş.
Ul äytkänçä, öyläne şulay şaktıy uk tiz cilterätep attım da aş yanına tabınga barıp utırdım.
häybät pilmän, min siña äytim! Citmäsä tagın hatın kuştanlanıp kitep, ber yartını, tege sovetskine dä alıp kaytıp kuygan ikän.
Ozın stakannı tutırıp berne salgan idem, pryamo mäsihläremä tikle yögerde, ayak barmakları üzaldına ber-berse belän söyläşä başladılar.
Şulay tege yartını sugıp, äybätläp torıp pilmän belän zakuslap, äzräk tayanıp torıym äle dip yatkan gına idem, ni äytäseñ bit, kahär, älege anası tagın äylänep kilep citkän:
—- Närsä yatasıñ, äydä tor, kiyäülär kilde, Kaban küle östendä yaraplan belän yörergä çıgabız! —di.
Torıp, äybätläp yaña çalbarnı podtyacka belän tarttırıp kidem. Kazakinı iñbaşına gına saldım häm kulga zontiknı tottım da:
— Kittek,— mäytäm,— hatın, äydä, anısına bez häzer! — didem.
Bala-çagalarnı iyärtep, aşarga-eçärgä alıp, äybätläp kenä kiyäülär belän bergäläşep kittek şulay.
Kaban küle buyına kilep citkännän soñ, ni küzem belän kürim: böten su öste yaraplan belän tulgan. Sipterälär genä, min siña äytim! Barsı da yaraplannarınıñ artlarına kärzine-kärzine belän «Kızıl şäreq» asıp cibärgännär— artlarınnan hozur bulıp cillänep bara. Yörüçelär üzläre barsı da yaulıklar bolgap, gät-gät itterep garmon uynıylar, cırlıylar. Şunda uk su buyında militsiyäse dä yörgäläp tora. Billärenä kayış belän ällä nitkän kanat sıman bernärsä bäyläp cibärgännär.
havadagı ayırım huligannar çüt äz genä artıgrak kılana başladılarmı, häzer, sibistuk buluga oçalar da kitälär. İ huligannarnı şunduk oçırtıp çastka alıp kitälär.
— Menä,— mäytäm,— kaya ikän ul, anary, dönya, pryamo sährä bit,— dim.
— Totı şul,— di anası,— ä sin yoklap yatmakçı bulasıñ! — di.
Keräşennär seminariyäse yanında bez dä kiyäülärneñ yaraplannarına utırıp kittek. Tege Gıylaci Hacilarnıñ dvornikları cigeşle at belän külgä kerep, miçkäsenä su töyäp mataşa ikän, ilahi kitte, min siña äytim, atı bezneñ yaraplannan kurkıp, dulap, eç kattı üzennän kölä-kölä.
Hatın şunduk yaraplan eçendä ük samovar kuyın cibärde, kiyäü dä kesäsennän ber bötenne çıgardı. Berärne sındırıp, paştetlar belän zakuslap algannan soñ, käyef tämam urınına barıp bastı. Dace bötenläy tirläp kittem. Kazakinı salıp, çöygä elep kuydım, izülärne çişep cibärdem.
— Ul podtyackañnı, bulmasa, ıçkındır,— di hatın äytä,— uñaysızlıy torgandır,— di.
— Niçava,— mäytäm, bezgä ni dä bulmıy,— dim. Tirä-yagıbızdan başka yaraplannar oçıp-oçıp kitälär.
— Tukta, änä şul kemnär? Sibälär genä sugışıp. Üzläreneñ yaraplannarı cimerelep betkän. Yuk, alay
yaramıy ul: stepenko gına yörergä kiräk anı! Änä inde üzlären rayonga da cilterätep alıp kittelär.
Kiyäü belän tagın berärne töşerdek. Şul arada samovar da kaynap çıktı. Äybätläp paştetlap, varenelap çäy eçärgä dip kenä torgan idek, ni kürik:
İsereklär töyälgän lomovoy arbası şikelle zur häm iske ber yaraplan can-färmanga bezgä kilde dä bärelde. . Tabındagı samovar belän kabartma, paştet häm varenelar bar da çälpärämä kilep bettelär. Zontigımnıñ sabı şartlap sındı, podtyackam da özelde. Sakallarım viç varenega buyalıp bette. Hatın da bar hälgä.kıçkırıp cibärde häm min... uyanıp kittem.
— Kahäreñ, älege sovetski töş kürep yatam ikän.