Baburnıñ Su Kranı

Hikäyä

Kazandagı Huşbuy institutında tozlı cıyılmalar bülegeneñ mödire bulıp eşläüçe Babur Möhämmätov ğadätençä yugarılarga zar belän yörergä yarata ikän. Äle bu eşe kilep çıga, äle ikençese digändäy, häzer direktor urınbasarı Zölfät Gayniyeviçnıñ işek töbenä kilep basa. Röhsät itelügä, kerep tä utıra, kulındagı käğazen suza. Ä Zölfät Gayniyeviç, anıñ ğadäten yahşı beläräk, şayartıp hälen soraştırgalıy.
Bu yulısı Babur äfände üzeneñ bülegendä eşläüçe ğalimä Hänisä Foatovnanıñ ille yäşlek yübilee uñayınnan yugarılarnıñ fatihasın alırga dip täbrik hatı äzerläp kertkän. Zölfät Gayniyeviç añardan:
— Büläkneñ yahşısın alasızdır inde?— dip soragan.
Babur äfände, institutta tülänüçe hezmät hakınıñ külämenä zarlanıp:
— Bezneñ akça belän bädräfkä dä kerep bulmıy!— diyäräk, kimsenep cavap birgän.
Zölfät Gayniyeviç mondıy ütä berkatlı häm mıskıllı süzlär işetermen dip kötmägänder inde, berazga telsez kalgan. Çama hiseneñ närsä ikänlegen yahşı belgän Babur äfände, söyläşüne tizräk sazlıktan çıgarıp, tigez cirdän atlatırga teläüdän, yarım aklangan tavış belän:
— Öydä su kranı vatılgan ide, yañasın alırga kersäm — meñ ike yöz sum tora, akçam citmägäç, çıgıp kittem!— dip, tagın tormış avırlıgınnan zarlanuga küçkän.
Zölfät Gayniyeviç:
— Ällä artık kıymmätlerägenä kızıktıgızmı? İtaliyädä eşlängänder ul!— dip, Babur äfändene beraz butap alası itkän.
— Yuk la inde,— di ikän Babur Möhämmätov.— Bezdä eşlängän. Mäskäüneke. Kranı da beräü genä. Uñga borsañ — kaynar su, sulga etsäñ — salkını, urtada kütärsäñ — cılımsa itep aga. Yahşı kran! Ber digän,— dip, tagın da zarlanu tavışına küçä barganda, Zölfät Gayniyeviç:
— Ä sez gadiyen genä alıp kuyıgız. Citmeş biş sum gına tora. Yöz yegerme biş täñkä saf ekonomiyä bulır,— digäç, Babur äfände berazga kauşap kalgan häm, kabat zarga küçep:
— Ozakka çıdamıylar şul. İskeseneñ tege-bu öleşlären dä alıştırıp karadım. Barıp çıkmadı,— dip, kileşmäven beldergän.
Zölfät Gayniyeviç tagın:
— Ä sez anı töbe belän alıştırmagız, borgıçlı urının, ventilen genä yañartıgız!— dip kiñäş birgän.— Anısı anıñ bötenläy dä unbiş sum gına tora. Beryulı meñ ber yöz dä siksän biş sum saf tabış! Ä sez, akça, disez! Uylap karagız: meñ biş yöz siksän sumnan artıgrak kerem! Şunda uk Bohara ämire Zahretdin Baburga äverelep kitäçäksez!
“Ämir” dip kütärülärenä söyengän Babur äfände gorur gına işekkä taba yünälgän.

Sentyabr, 2002.