Äyter İdem İsemen...

(hikäyä)
Sayra atlı min. Avızıñnı yırma, üzeñ dä ällä kem tügelseñder äle! Şul sineñ kebek kabak başlı, yırık avızlı malaylar "balık konservası" dip kuşamat taktı da inde mäktäptä ukıganda. Tapkannar isemen! Ul äti-änilär balalarına isem kuşkanda ni uylıylar ikän?! İsem töymä kebek tügel şul, tekteñ dä, ber zaman töşep kalır, dimä, gomerlek.

Şul isemem arkasında kürmägännär kalmadı. Yäş çak. Kürşe avılı yegete kiçen artımnan ozata kilde.

- Äydä, tanışıyk, - di bu.

- Sayra, - dim.

- Sayrar idem, koş tügel şul min, - di, biçara, üzençä añlap.

Ber bäheteñ kitsä, kitä inde ul. Şähär diskotekasında çibär genä yeget biyergä çakırdı. Ğadättä süzne tanışudan başlıysıñ.

- Davayte znakomitsya. U menya imya, koneçno, strannoyı, - di bu rusça. - Nafik.

Mineke dä Gölçäçäk tügel anısı, tik monıñ hälläre tagın da yamanrak ikän!

İh, elek bulgan ul, içmasam, isemnär! "Bibisorurgölcamalkayım", - dip suzıplar cibärsälär, niçek küñelläreñ eremäsen!

Siña totsınnar da balık iseme kuşsınnar äle. Berär tatarça beler-belmäse "Sarra" yäki "Sar" gına dip endäşsä, nindi mähäbbät, di, bulgan hisläreñ dä bozlanıp katır.

Änä, Galiyälär turınnan kiçen avılda yegetlär:

- Galiyäbanuım, sıluım, irkäm, - dip cırlap uzalar ide. Bezneñ turga citä başlasalar, başımnı mendär astına yäşeräm.

- Balık kap, yar östendä yaltırap yat, - dip ürtärlär sıman.

İh, küktän Yoldız bulıp atılsañ ide, Koyaş bulıp nur sipsäñ häm Miläüşä, Lälä, Sömbellär bulıp huş is börkesäñ ide dä, Karlıgaç bulıp oçsañ ide. Beräüneñ yörägenä Naz bulıp iñsäñ ide dä, ul sine gomere buyı yomşak, yagımlı isemeñ belän atap däşsä ide!

Click or select a word or words to search the definition