Äy, Häzerge Bala-çaga!

(yumoreska)
Yazgı salkın könnär uzıp, cäygä kergäç, yäşläre siksängä citep kilüçe Könkürmäs karçıkları Şämsiyä belän Märziyä tagın da yakınayıp kittelär. Kön sayın bulmasa da, ike könneñ berendä oçraşalar, äle bersenä, äle bersenä çäy eçärgä yörilär. Şul çaklarda ber-bersen bülderä-bülderä, kış buyına cıyılgan eç serlären urtaklaşa ike ahirät. Menä bügen dä samavar kaynap çıkkannı kötä-kötä, mıdır-mıdır söyläşä başlagannar ide, süz yünäleşe üzennän-üze onıklarınıñ uku turına kerep kitte.

— Karale, ahirät, — dip başladı süzen Şämsiyä, — sineñ töpçegeñneñ urtançı ulı unberne beterde tügelme? İmtihannarın niçek birde soñ?

— İ-i, ahirätkäyem, birep beterde-beterüen, tik matikmatiktan öçle algan. Ber mäsäläne çişä almadım, di.

— Avır mäsälä turı kilgänder inde?

— Avır dip, funıksiyäneñ tege ni... Närsä soñ inde? Menä tel oçında gına tora, tanış süz inde, onıtkanmın.

— Tamırların, diseñme ällä, ahirät?

— Äye-äye, tamır! Şul funıksiyäneñ tamırların döres tapmagan. Karale, sin, Şämsiyä, matikmatiknı beläseñ, ahrısı, nibuç?

— Äy, beläm dip inde! Kaya inde ul minem ike klass belem belän?! Minem Rifatnıñ kızı da uzgan yıl ikzam birep yörde bit. Şul äzerlängändä beraz kolakka kerep kalgannı gına äytüem. Minem onık ta şul matikmatik belän intekte inde. Tege Fifagur tiariması bar bit äle, şunı onıttım da kuydım, di.

— İ-i, ahirät, anısı gupçim ciñel närsä bit anıñ. Şunı da onıtkanmı? Tege kätlitlärneñ şakmakları sumsası turında bit äle ul?

— Yuk la inde, Märziyä, kätlit tügel - kätit, şakmak tügel - küädrät, sumsa tügel - summa. Äye, änä şunı onıtkan, billähi. Kaytkaç üzem dä açulandım. Äy, häzerge bala-çaga soñ! Min biş klass belemem belän dä...

Şämsiyä karçık «yuk inde» digändäy, kul seltäp, bötenläy çitkä borılıp utırgan ide, Märziyäse kabat süz başladı.

— Şämsiyäkäy, ul Fifagur digännären äyter ideñ, bigräklär dä zatsız adäm ikän inde. Balalarnı tilmertep, şundıy tiarimalar uylap çıgarmasa soñ?!

— İ-i, ahirät, Niutın digännäre yanında Fifagur püçtäk kenä äle ul. Minem Änisäneñ malayı Täfkil unberne betergändä, fizikadan şul Niutın zakunnarı turı kilep, gacizlänep betkän ide. İke zakunnı häterlim, öçençesen onıtkanmın, di.

— Äytmä dä inde, ahirät, balalarnıñ milären çeretep, öçär zakun çıgarıp yatmasa soñ, berse genä citmägänder anıñ. Uku bit ul bolay da enä belän koyı kazu. Ul Niutın digäne bezneñ keşe tügelder, Şämsiyä. Yugıysä, bezneñ tatar bulsa, balalarnı cällär ide beraz. Cäbrider ul?

— Ul zakunnarnı äytäm, bigräklär dä küp çıgaralar inde, Märziyäkäyem. Kaysı fänne genä alma — zakun da zakun. Üzebez intekmäsäk tä, onıklar cäl şul.

— Söylämä inde, ul zakunnarnıñ äle berärse ütälsä yarar ide. Änä bit, hökümät çıgargan yaña zakunnar da ütälmi. Ä Fifagur belän Niutınnıñ ällä kayçan çıgargan zakunnarı ütälmi dä ütälmi inde...

İke karçık barlık onıkların änä şulay ber kat barlap çıkkaç, häzerge ukunıñ avırlıgınnan zarlanıp, sukranıp alalar da, äy dönyalar köysezlände şuldip, kul seltäp, çäy eçä başlıylar.

Click or select a word or words to search the definition