Avızıñnı Belep Açmasañ...

(yumoreska)
Gayfineñ küñele kütärenke, käyefe şäp ide. Şunıñ işe vakıtta şatlıktan dönyanı koçası, kıçkırıp cırlıysı kilä. Häm ul yul çitendäge eskämiyägä kilep utırdı da, ireksezdän uyına kilgän berençe cırnı şıñşıy başladı. Annan soñ, tulıp taşıgan küñele tüzmägäç, kıçkırıp uk cırlarga kereşte:

Mäk çäçägen özdem yalgış kına,

Çüp üläne diyep butadım...

Tik aña cırın dävam itü nasıyp bulmagan ikän, şulçak ike yak iñsäsennän kemnärder totıp aldı. Gayfi başta monı berär tanışı şayarta gına dip uylagan ide. Tik artka kayırılıbrak karasa, militsiyä forması kigän tanış tügel ike adäm. Kem beländer butagannardır da, häzer, kürgäç cibärerlär, dip uyladı Gayfi. Tik ıçkındıru tegelärneñ uylarında da yuk.

Kön sayın berär yaña zakon çıga torgan bu zamanda, ällä soñ cämäğat urınında kıçkırıp cırlarga yaramau turında da berär zakon ämälläp taşladılar mikän deputatlar, digän uy yögerep uzdı Gayfineñ başınnan. Anıñ uyların bülep, tegelärneñ berse süz başladı:

- Narkobizneska kereştem, diseñ inde, alaysa?

Eşneñ mondıy borılış alasın kötmägän Gayfi totlıga-totlıga aklanırga totındı:

- Nindi nar... narkobiz... biznes, kem beländer butıysız bugay. Min bernindi biznes belän dä şögıllänmim.

Tik tege adämnärgä bu süzlär tırnak oçı qadär dä täesir itmäde.

- Äle yañarak kına, mäk çäçägen özdem, dip kıçkırıp toruçı sin ideñ tügelme?

Gayfi şunda gına añlıy başladı.

- Äye, min! - dide ul, eşneñ närsädä ikänlegen tiz genä töşenderep, bolarnı oyaltaçagın uylap, avızın cäyep yılmaep ta kuydı hätta. Tik formalı keşelärneñ yözläre citdi ide. Sul yaktagısı kesäsennän kızıl tışlı nindider tanıklık aldı da, Gayfineñ borınına teräde:

- Bez militsiyädän. Narkotiklarnıñ zakonsız äyläneşenä karşı köräş bülege hezmätkärläre, - dide ul, kırıs kına. – Mäkneñ narkotik yasau öçen çimal itep faydalanıluın beläseñder, şät? Mäk özüeñne yäşermiseñ inde dimäk?..

- Äye, tik ul yalgış kına... äy lä ul bit...

Tegelärneñ citdi kıyafäte Gayfine tämam butaştırdı. «Ul bit cır gına» dip äytmäkçe ide dä, yugıysä.

- Çüp üläne dip butaganıñnı da äytteñ bugay? Dimäk, bakçañda çüp üläne utaganda, yalgışıp kına mäk çäçägen dä özgänseñ. Ä bakçada mäk üstergän öçen nindi statya karalganlıgın beläseñme soñ?

Bu süzlärne äytkän adäm, inde borgalanırga urınıñ kalmadı, kilep kaptıñ, asıl koş, digändäy Gayfineñ kulın tagın da kısıbrak tottı.

- Bakçam yuk minem, beldegezme? Cibäregez! – Gayfi ıçkınırga teläp kulların yolkıp karadı, tik yukka gına.

- Ähä, üz bakçañ yukmı? Keşe bakçasına kergänseñ alaysa. Keşe milkenä kul suzgan öçen tagın ber statya çäpärgä bula. Ya, äyt kaydan özdeñ ul mäkne? Urının kürsät bezgä...

Kulların ıçkındırırga mataşuın, kaçarga cıyınu dip añlap bulsa kiräk, militsionerlarnıñ berse Gayfineñ kullarına bogau kiderep alırga da ölgerde.

- Ya, gayıbeñne tanıysıñmı?..

- Nindi gayıbem bulsın minem, cır gına bit ul, - dip aklanıp mataştı Gayfi.

- Karale, kara, cır gına, dime?! Üze dä narkotik kullanadır bu. Yuksa, östendä şundıy statya torgan keşe şulay bitaraf bula alamıni?! Östävenä, cır gına ul, dip torgan bula bit äle...

Şul arada, sirenaların yaman açı kıçkırtıp, militsiyä maşinası da kilep tuktadı. Gayfi karşılık kürsätep mataşmadı. Bolar belän tartkalaşunıñ mäğnäsezlek ikänen töşengän ide inde ul. Etkäli-törtkäli maşina eçenä kertkändä, tiz arada cıyılıp ölgergän halık törkeme arasınnan ike hatın-kıznıñ äñgämäsen genä işetep kaldı ul.

- Tagın kemne eläktergännär?

- Narkotiklar belän säüdä itüçe, di. Kesäsennän ber kiloga yakın narkotik algannar, beläseñ kilsä!

- Kür inde sin, täki azındılar bit bolar. Sudsız-nisez urında teräp atası şularnı...

- Äy, bezdä zakonnar katımıni soñ?..


Click or select a word or words to search the definition