Aşıgız Tämle Bulsın!

Hikäyä

Tatar barda — hätär bar, urıs barda — “milost” bar, dilär. Bu süzlärneñ mäğnäse şulkadär dä tirän mikänni? Biçara tatarlar, niçämä tapkırlar kütärelep çıgıp ta, hökümät eşläre tämam kullarına kerep betkäç, anı kabat urıska kaytarıp birä tordılar. Mondıy hällär minem gomerdä genä dä küz aldımda berniçä kat bulıp, häzer şular isemä töşä dä, açınuımnan yörägemne totıp yögerep yörim, ul menä-menä özelep töşep kitär sıman. İ min yülär, i min ahmak, tintäk, mikänä!
Bervakıt aşka çakırgan idelär. İte katı buldı, anı çäynäştergändä teşlärem işelep bettelär, kaznalarına qadär cimerelep töştelär. Ser birmädek, bazar iteder, didek, kulı katı keşe suygan mal bulgandır, imeş! Bezneñ halık şundıy afärin inde ul!
Här avılnıñ diyärlek yomşak kullı sugımçısı bula. Bar da şuña yögerä: yä tavıgın-ätäçen kıstırıp, yäki sarık-käcäsen çaldırırga çakırıp...
Aşıgız tämle bulsın diyärgä telägem inde bu, yuksa, vakıygalarnı bolay çäçep söyläüneñ hiçber mäğnäse yuk! Ä menä kürşeneñ sugım eşenä häväslegen hiçkem belmi. Tavıklarınıñ da östenä genä basa, sarıkların da botarlap kına taşlıy. Bezneñ Abzalıy abzıy citeşkänçe, kürşem tire-yarını koymaga elep cillätergä dä ölgerä. Bulgan da keşe inde, cen belän ber. Yärdämgä ällä diyü-pärilären dä eşkä cigä inde? Tik kotkısı gına zur, şäüläsennän dä agaçlar yafrak koya başlıylar, färeştälär kanatların sındıra, oçıp baruçı koşlar taş kebek cirgä yıgılıp töşälär.
Ozın Fälähetdingä duslıgı bar ide, sugımçı itep kürşemne däşkännär. Bähet kümgän bolarnı, kıska süzne dä çakrım yarımga suzıp-suzıp söyli ikän Fälähetdin abzıy:
— Kuyan qadärle sarıgıbız da ber cäygä citä yazdı. İke malayım, üzem, hatınım, kızım... Kunak ta alıp karadık, betmi genä bit, rähmät töşkere! Kimergän sayın ber teşemne aksatam...
Bez uylıybız inde, bu Fälähetdin abzıy, dibez, küz buyamakçı, teş aksıy, imeş, kaya di ul, avızı tulı teşlär anıñ, tegermän taşları kebek şakı-şokı kilep toralar, iteñne tügel, söyägeñne izärlär. Aşıgız tämle bulsın!
Ägär dä kuyan qadärle sarıgıgıznıñ ite cäy buyına citärlek bulsın disägez, sugımçı itep bezneñ kürşene çakırıgız, ike-öç yıl eçendä çerep bayuga yul totaçaksız! Ä min, cämäğat, teşsez keşe, rizıknıñ yomşagına künekkän bändämen, berük üpkäli kürmäsen, öräge katı keşedän çaldırıp, terlek-tuarımnı cäzalıysım yuk inde! Sugımnı kurkıtsañ, ite katı bula dilär tügelme? Yomşak keşeneñ kulınnan uzgan kart sugımnıñ da ite cilek kebekkä äverelä, imeş. Monısı uk artıgrak, şıttıru bulırga kiräk!
Aşıgız tämle bulsın!

Fevral-mart, 2004.

Click or select a word or words to search the definition