Bülägem

Totkınlıkta tanışkan belğiyäle dustım
Andre Timmermanska

Kaytsa ide göllär arasında
Görläp ütkän köläç könnärem,
Duskay, siña büläk itär idem
İlkäyemneñ irkä göllären.

Ber närsäm yuk minem monda häzer,
Yortım, bakçam, hätta irkem dä.
Göllär monda bar da kibep sulgan,
Cirlär monda çitlär irkendä.

Tik bar minem kara uylar belän
Taplanmagan kersez yörägem.
Yörägemneñ yazgı göllär tösle
Cırı bulsın siña bülägem.

Üzem ülsäm, ismem, cırım ülmäs,
Ul yañgırar ilneñ kırında.
Söyläp ilgä totkın küñellärdä
Çäçäk atkan duslık turında.