Bahaları könläşerlek


Üz hönären mökibbän yaratqan, här kön eşkä zur teläk menän kilgän, quşılğandı qänäğätlek toyğoho menän başqarğan keşegä ni käräk? Hezmäteñde bahalap, ber yılı hüz äythälär, qanattarıñ üsep kitkändäy bula...

Sud pristavtarı hezmäteneñ Neftekama rayon-ara bülegendäge sud pristavı-başqarıusı, 3-sö klaslı yustitsiya sovetnigı Zäliä İbrahimova — näq şunday fekerzä.

— Tormoşomda tik yaqşı keşelär osranı, yıtäkselärzän dä uñdım, — ti Zäliä Möhämät qızı. — İdaralıq yıtäksehe, Başqortostandıñ baş sud pristavı Zarif Bayğusqarov eşlägän keşene kürä belä. Üzebezzeñ bülek yıtäkseläre menän dä yartı hüzzän añlaşabız. Oşo sistemala 35 yıldan aşıu hezmät itep, ber şeltä lä alğanım bulmanı.

Qatın-qız ösön bigük ğäzäti bulmağan eş başqarğan Zäliä İbrahimova ir-yıgettär könläşerlek bahalarğa eyä: Räsäy Yustitsiya ministrlığınıñ häm Sud pristavtarı federal hezmäteneñ yıte mizalı menän büläklängän, “İñ yaqşı pristav-başqarıusı” bildähenä layıq. Fotohı — idaralıqtıñ Poçet taqtahında, maqtau qağızzarı la bihisap. Ä huñğı büläkte alırğa bıltır unı Mäskäügä saqırzılar. İldeñ qanunilekte nığıtıuzağı, gracdandarzıñ hoquqtarın häm mänfäğättären haqlauzağı hezmäte ösön Räsäy Prezidentınıñ Rähmät hatına layıq bulğan aldınğı un biş sud pristavı arahında Zäliä Möhämät qızı la bar ine.

Mäsetle rayonınıñ yämle Äy buyında urınlaşqan Salyoğot auılınan ul. 17 yäşendä udar komsomol tözölöştäre tip iğlan itelgän, yaqın kiläsäktä bötä ildä tanılğan avtomobildär zavodı, yahalma kün yıteştereü berekmähe tözölöşönä respublika yäştären üzenä saqırğan Neftekamağa yullanıuın da, oşonda ğümerlekkä töpläneüyen dä yazmışı tip hanay Zäliä. Qalağa kilgäs, ber az tözölöş oyoşmahında eşläy. Ämmä bala saq hıyalı — hoquq haqlau organdarı hezmätkäre bulıu teläge — yıñep sığa. 1977 yılda ul Krasnokama rayonınıñ halıq sudına sekretar bulıp eşkä urınlaşa, tağı ike yıldan Neftekama qala sudına ölkän sud başqarıusıhı itep saqırıla.

— Eş serzärenä tiz töşönöp kiteüyem menän sudtıñ ul saqtağı räyıse Mäğäfür Yäğäfär ulı Hösäyınovqa rähmätlemen, — ti Zäliä Möhämät qızı. — Käñäştäre bik fayzalı buldı. Bergä eşläüselärzeñ hämmähenä lä käräk saqta yarzam qulı huzzı.

Halqıbızzıñ aldınğı ul-qızzarına has bulğan talapsanlıq, yökmätelgän eşte namıs menän başqarıu, yäştärgä quldan kilgänsä yarzam itergä ıntılıu, keşelär menän urtaq tel taba beleü keüyek matur sifattarğa eyä Zäliä hanım — ısın mäğänähendä üz eşeneñ ostahı. Huñğı yıldarza uğa sud pristavtarı hezmäteneñ iñ qatmarlı yünäleştäreneñ berehe, nıqışmallıq häm talapsanlıq talap itkän aliment mäsäläläre menän şöğölläneü yökmätelgän.

— Hezmätem keşelärgä yarzam iteügä qorolğan. Tormoşta auırlıq kisergän yäş äsälärgä bulışırğa tırışam. Ğailäne tarqalıuğa alıp kilgän säbäptärze tabıp, mömkin bulğanda ularzı bötöröü yuldarın ezläşäm. Bähetkä kürä, şunday äñgämälärzän huñ yañınan bergä yäşäp alıp kitkän parzar za az tügel. Kemgäler yaqşılıq eşläüyeñde, fayza kiltereüyeñde küreü – üze olo şatlıq mineñ ösön, — ti Zäliä İbrahimova.

Zäliä Möhämät qızı ğailähendä hörmätle qatın häm hästärlekle äsäy zä. İre Mözäris Ğäli ulı menän ike qız üsterep, olo tormoş yulına sığarzılar. Bögön ular, olatay häm öläsäy bulıu şatlığın kiserep yäşäy.


Neftekama qalahı.