Vakıt Sukmagı

Televizor häm şağıyr

Çın şağıyr – ul yalgançıdır,

Dönyanı küzallauçı,

Tabiğat belän söyläşep,

Çınbarlık belän köräşep,

Mähäbbätlärdä görläşep,

Televizor karauçı...

Televizor tartmasında,

Närsäder mataşalar

Bezgä mäğlümatlar satıp,

Bezgä moğciza karatıp,

Soklandırıp häm yaratıp

Çibär kızlar kalalar.

Bez aldıybız, aldanabız,

Bez – ber häyläkär karçık

Gaybät söyli zäñgär tartma,

Bez anıñ artınnan hätta

Yalganabız, aldalap ta –

Çın şağıyr bit yalgançı...

****

Oçraştık bez oçraklıdır

Kazan uramnarında,

Eskämiyädä utırıp,

Sıralar eçep utırdık,

Kiläçäk eşlärne kordık,

Biznes bolınnarında...

Tabışlar buldı uñışlı

Bez başka oçraşmadık,

Min ul oçraşunı ezlim,

Cäylim, kışlım, annan közlim

Ütkänneñ ezlären küzlim,

Läkin tabalmıym şunduk...

Oçraşkan idek oçraklı,

Bulgan ikän kem ul, kem?

Ütkännäremne aktardım,

Eşläremne karmakladım,

Bügen genä çak añladım,

Bulgan ikän ul üzem...

Eskämiyägä utırıp,

Uyladım häm añladım:

Üzeñ belän kiñäşläşep,

Yäşärgä alalmavın…

Türälärgä mädhiyä

Cırlıy halık, ütä küñelle

Baradır ul tormış yulınnan –

Yullarıbız idaräse yahşı eşli,

Hätta çıkmıylar da restorannan...

Äydä türälärgä gimn cırlıybız

Cıyılışıp alarga soklanıyk:

Hisaplarda alga barabız bez –

Vakıtında urazalar totıyk.

Maktıybız alarnı

Kiläçäkkä barıp keräbez,

Häm här könne şunı sizmiçän dä

Türälärgä bezneñ mädhiyäbez!

Çeben

Täräzädän karıy-karıy tuydı yeget,

Eçe poşa, yoklap karıy ul törenep –

Ämma yokı kilmi anıñ küñelenä,

Hıyalları ul yegetneñ gel sürenä...

Ä şul çakta pıyalaga bärä çeben,

Häm uylanıp kuya bezneñ yeget şulçak dören:

“Buş hıyalga bäreläseñ sin, divana,

Ä bit bez dä çeben genä bu dönyada...

Ul bähetle, anıñ kaygılar çüp-çar,

Ul härvakıt uylanmıyçan aşar, oçar,

Ä menä min...” – monda anıñ açuı çıktı,

Ul karadı da çebengä, kiterep suktı...

İrtägä

Vakıt atlıy, şähär yoklıy,

Ä närsä bulır irtägä...

Närsä? Kayçan? Kayda? Nigä? –

İrtägälär sorau tuplıy.

İrtägädä yäşi hıyal,

Kötä ömet, kaynıy uylar,

Kiläçäkkä suzıla kullar,

Yäşi şul yakta ihtimal...

Älegä bügen. Tögäl hisap

Yuklıktan sanıy mäñgegä,

Yakınlaşasıñ irtägä,

Siña karıybız soraulap.

Bügen – tormışnıñ kaldıgı,

Artta kalgan ber bagana,

Ämma bügendä tuplana

İrtägäneñ maturlıgı...

İske säğat döres yöri

İske säğat döres yöri,

Minem tormışımnı ülçi,

Anıñ tele köyläp söyli –

Haknı äytä...

Gomeremneñ ählaklıgın,

Kaygı-häsräten, şatlıgın –

Häbär itäseñ barlıgın,

İske säğat.

Vakıt atlıy almıy-talmıy,

Tormışka bitaraf karıy,

İske säğat tögäl sanıy

Yıllarımnı.

Tormış kayçak añgırayta,

Şäp isertä dä aynıta,

Ämma säğat yakınayta

Yazlarımnı...

İske säğat döres yöri,

Tögäl tormışımnı ülçi...

Kiçä

Ni genä kiçädä yäşämi:

Monda häzer uylangan yalgan,

Monda küptänge zarar-zıyan,

Häm ülgän hıyalllar söyläşmi...

Kiçädän alıp ömetlärne

Häter irtägä alıp taşlıy:

Kiçä belän keşe sataşmıy,

Uyata kaberdän betkänne.

Kiçä – häter, kiçä – ul yalgan,

Andagı sabaklar öyrätmi –

Fikerlär sargaya,

küñelne tibärätmi –

Alar vakıttan töşep kalgan...

Kiçägene söyläp, iserep

Utıra ide ber divana –

Kem ul kiçä belän maktana

Zirattan mäyetne kütärep?

Tormış sukmakı

Bez niçekter tormış yulına

Ayak bastık, anda küplär inde

Kaz sıman taptalıp tordılar...

Sukmak tägäri çakır-çokır,

Aşıkmıyçan annan baralar

Türä, bay, eşmäkär, bahadir

Yäşellär, kızıllar häm aklar.

Ul sukmakta yazıp kuyılgan

Yazmışlar häm kılanışlar,

Gomerlärebez tasvirlangan,

Häsrätlär, şatlıklar, sagışlar...

Bez kittek. Beräü çalış ayak

Sukmaknıñ kırıyın taptagan;

İkençese – iserek yabalak

Sukmaktan da çıgıp karagan...

Alarnıñ ezläre butalış,

Sukmak berniçek tä turaymıy –

Bälki baruıbız da yalgış,

Ämma barmıyça yäşäp bulmıy...

Tormış yulınıñ yartısında

Karurmanga kilep teräldem,

Berkem mine oçratmadı anda,

Yalgızım anda kerep kittem...