Şiğırlär - Rämis Aymät

Täräzä
Açıgız täräzälärne,
Täräzägez bulsa!..
M. Äğläm

Täräzlär bar, läkin açılmıylar;
Räşätkäle bezneñ täräzälär.
Kadaklangan alar (ozakkamı?!)
Açılmaslık itep.
Küräzälär
Bezne bütän aldıy almas inde.
Ütte inde cannan andıy agım.
Uylap kuydım äle min, nigäder,
Täräzlärneñ karındıklı çagın.

Härber uyım küñel uçagıma
Östi genä bara köçle yalkın.
Sürän karındıklar aşa da bit
Yıraklarga karıy algan halkım.

Dörli-dörli, ozın tönnär buyı,
Yörägemdä küpme uçak yagam?!
Räşätkäle täräzälär aşa
Räşätkäle räşälärgä bagam.

Bagam räşätkäle dönyalıkka,
Çitlektäge yırtkıç canvar sımak.
Küpme bula adäm cannarında
Bertuktausız täcribälär sınap?!
Ber istälek

Nigä mine haman gazaplıydır
Yırakta kalgan ber istälek?
Küksel toman aşa kalka da ul
Bertuktausız töşä iskä nik?
Yafrak-yafrak oçkan hatirälär
Tora gına canga östälep.

İskä töşä... İnde onıtıldı dip,
Uylıysıñ da, kabat yañara.
Cillär can iñdergän uçak kebek,
Totına ul kabat yanarga.
Totına ul uzgan yäşlegemneñ
Sadä minutların sanarga.

Däftär biten açsam, ul İstälek
Kilep çıga kipkän göl bulıp.
Sulgan söyü bulıp oçıp töşä,
Tuzgıp oça sagış-köl bulıp.
Kötmägändä kinät Bügengemnän
Ütkänemä töşäm ubılıp.

Ütkän — ütkän! Yätmä kebek cannı
Küpme genä anı tetkälä...
Ul karaşlar... haman üzäk özep,
Yıllar aşa miña tekälä.
Cilep uzgan yıllargamı häzer,
Yazmışkamı ällä üpkälä?

Tıngı birmi haman ul istälek,
Tıngı birmi ber dä — kiç, irtä...
Yartı töndä kabızıp utlarımnı
Küñel täräzämne ul çirtä.
Hatirälär aga taşkın bulıp,
Taşkınnarga barmı soñ kirtä?

Şıbır-şıbır yañgır yılavı da
Alıp kayta anı Ütkännän.
Yafrak şavı, cillär sulavı da —
Barısı da, bar da ul könnän.
Ul könnärgä kitep yugalsam da,
Min mäñgegä, yuk, yuk, ükenmäm.

«Kaytarıgız Ütkännärne!» diyep,
Beräüdän dä inde ütenmäm.

...Ükenmäm!..

Min äle tumagan...

Min äle tumagan, min äle
Ürelep bakmagan dönyaga.
Min äle Mäñgelek irenendä
Böregä töynälgän ber Doga.

Min äle tumagan, ämma min —
Karında kaynagan ber Dävam.
Kaydadır cil bulıp isäm dä,
Kaydadır kar bulıp min yavam.

Min äle tumagan, işetämsez
Canımda ğalämneñ güläven?
...Dulkınnar iyärtep kitkänder,
Tibrätep minem ak bilävem.

Min äle tumagan, ä inde,
Ä inde... arılgan yäşäp tä.
Niçä kat tuamdır? Yazmışım
Kügendä gel timer räşätkä.

Bu dönya — garasat mäydanı.
Ällä soñ yäşäü dä — ber cäza?!
...Min äle tumagan, ä inde
Küklärdä ukıylar cenaza.