Шигырьләр - Кашшаф Патии

Илләрдә
Бар, рәхәтлән, егет, чык илләргә,
Урман-суы бай, мул җирләргә;
Хәсрәтеңне сөйләп таратырсың
Ил кызлары — нәзкәй билләргә.
Бар син, мәэюс (1) егет, бар илләргә,
Күңелле, ак көнле җирләргә;
Илләрдә ил дәрте, җан рәхәте —
Ауру күңелләргә, чирләргә.
Барсаң, егет, йөрсәң ул илләргә,
Гомрең әрәм китмәс җилләргә;
Анда ил кызлары каршы алыр
«Лилләр-лилләр» җырлап илләрдә.
Бүтән җирдә түгел, тик илләрдә
Тап килерсең матур, тиңнәргә;
Чапкай итеп гармун каршысында
Җыр җырларсың «лилләр-лилләр»гә.

Тукайга
Тукай, син бриллиант халкың күзендә,
Наман ялт-йолт итәр «Ялт-йолт» йөзеңдә.
Бәләнд (2) рухың, бәләнд аң диңгезендә,
Тирән эз калды ул узган эзендә.
Гали максатка юл ачкач сүзеңдә,
Барыр мәңге, калыр үз телемездә.
Шүрәлең көлдерә кич, көндезендә,
Хыяллар чәнчелә үткен безеңдә.
Тыныч тор, акланып тор акбүзеңдә,
Чәчәк атты гөлең дә һәм гүрең дә.
Югалды, үлде дип гамь чиксәләр дә
Көләсең, җырлыйсың син йир түрендә.

1 Мәэюс — өмидсез.
2 Бәләнд — бөек.