Şiğırlär - Karim Amiri

Sabançı

Yazgı kırda eşli ber sabançı,
Turı atın cigep sabanga,
— Bäräkät bar,— di-di,— fäqat tezelep,
Dulkınlanıp üskän salamda...

— Tart sabannı, äydä, bahbaykayım,
Eşläsäk, bez açlık kürmäbez:
Başka illär açlık kürgändä dä,
İkmäk yuktan suzılıp ülmäbez.

Kulga algan irken tormışnı bez
Saklarbız tik fäqat eş belän;
Zinnätlärbez irken, yaktı könne
Eşkä birgän izge köç belän!..

Tatarstan

(Tatar cömhüriyäte täsdıyk kılınu mönäsäbäte belän)

1

Änä... kiñ il... anıñ cäyläüläre —
Tabiğatneñ gölle sahrası;
Fäciğ önnär birep yığlıy läkin
Ul cäyläüneñ tormış sähnäse.

Sahrasında anıñ nurlar balkıy,
Läkin anda yañgırıy zarlanu;
Kiñ ildä dä, şundıy cäyläülärdä
Tormışında sızlap, tarlanu.

Yılan disäñ, üze keşe tösle,
Zähär çäçä läkin yılan kük;
İrken kön yuk ilneñ iyäsenä,
Sıkrıy üksez bala sıman kük.

Bögärlänep yatkan şul cäyläügä,
Kara yılan kebek, kara köç;
Agu birep, ilneñ balasınnan
Gönahsızga här kön ala üç.

2
Gönahsız üç cirdä kalmıy, dilär,
Akmıy, dilär, buşka haksız kan;
Adäm kanı ber kön kayta, dilär,
İzelä, dilär, ber kön paqsez can.

Gomerlärder yanıp, kümer bulgan,
Näfrät utı tulgan yöräklär,
Can açudan ükerep, sikerep çıkkaç,
Teträp kitte mälgun öräklär.

Yılan kebek bögärlänep yatkan
Cäyläüdäge kara köçlärgä,
Usallıktan, şaytan yöze kebek,
Kara cirdän kara töslärgä.

Cäyläü totkan köçle il ulları
Sugış açtı, ärnep açudan;
Kara-karşı sugış kitkäç, kannar
Därya bulıp aktı basudan.

Can ärnüdän, ilneñ balaları:
«İrek!»— dide, alga atıldı,
Yögerep barıp, küzen ber yomdı da
Kara köçkä häncär batırdı.

Yılan kebek, cirgä bögelep töşte,
Ölgermäde küzen açarga;
Şunda da ul, ilgä teş ırcaytıp,
Avız açkan agu çäçärgä.

Şunı kürgäç, irek batırları
İkençe rät häncär çaykadı,
Teş ırcaytkan yavız kara köçneñ
Bugazına tıgıp aykadı.

Tındı kiñ il häzer kara köçtän,
İrken kaldı, köne canlandı;
Matur kırlar, bolın, kiñ cäyläülär
Çäçkälände, göllär allandı.

Korban birep, kön-tön tartışkanga,
İrek aldı ilneñ ulları;
Kiläçäktä ilne bähet kötä —
Bähet yulı anıñ yulları...

Cırla

Cırla, yeget, cırla,
Matur cırga
Häyran kala matur kız bala:
Sızıp-sızıp
Cırlap cibärügä:
«Bu kem ikän!!!»— diyep sızlana...
Cırla, yeget, cırla,
Häyran kalsın
Cir kızları sineñ tauşıña,
Uyna kuray,
Cırla sızıp-sızıp,
Däva bulsın cırıñ barsına...
Kükkä karap,
Turgay moñın tıñlap,
Havalardan küzen almagan;
Küktä ezläp moñnar,
Yaktı nurlar,
Matur küzen cirgä salmagan —
Kinät alıp küzne,
Sine ezläp,
Uysu cirgä küzen ber salsın;
Väyran kızlar,
Häyran bulıp cırga,
Büläk öçen cirdän göl alsın!..