Kärländiyä hronikasınnan

(mäktäp yäşendäge ukuçılar öçen fentezi)
Baş süz.
Min sezgä kärkeşlär tormışınnan ber hikäyät belän tanıştırırga uylıym. Bik tä kızıklı ul. Kemnär kärkeşlär disezme? Kärkeşlär bik tä matur Kärländiyä cirendä toralar. Alar kıyafätläre belän bezneñ kebek ük keşelär, tik buyları gına kärlä alarnıñ. Şuña da illären dä Kärländiyä dip yörtälär dä inde.
Bik tä tırışlar alar kärkeşlär. İgen üsterälär, hönärçelek, timerçelek belän dä şögıllänälär.
Kärländiyä ile üze bik zur da tügel. Barı biş avıldan gına tora, ämma bik matur häm cıynak avıllar alar. İñ zurısı - Kärbaş şähärgäräk ohşap tora. Monda taş yortlar da bar.
Kärbaş avılı zur bulmagan yäşel tau yanında urnaşkan. Bu tau başında siher başlıgı Kämerneñ yortı urnaşkan. Kämer barlık kärkeşlär belän idarä itä dä inde.
Kärbaş yanınnan Zäñgärsu yılgası aga. Anıñ başı tönyak-könçıgış yagındagı Karurman eçendä başlana. Döresen genä äytkändä, başka avıllar da şuşı Zäñgärsu yılgası yarlarında urnaşkannar. Zäñgärsu üze Közgekülgä koya. Kül, isä, üzeneñ isemen közge kebek yaltırap torgannan alına dip isäplilär kärkeşlär...
Kärländiyä avılları, äytüebezçä, barısı da Zäñgärsu yılgası itägenä urnaşkannar. İñ zur avıl Kärbaş, yılga Közgekülgä koygan urında urnaşkan. Kärbaştan östäräk Kärtim avılı, annan östäräk, Urtakär, annan Kärike häm iñ soñgı avıl - Çitkär.
Çitkär avılı iñ borıngılardan sanala. Monda iñ elek siherçe Kämerneñ kartätise kilep urnaşkan. Berençe kärkeşlär dä monda Kämerneñ kartätise Ämir belän kilgännär, dilär.
Çitkär avılı barlıgı yegerme yorttan tora. Unısı Zäñgärsunıñ uñ yarında, unısı sul yarında urnaşkan. Yarlarnı zur bulmagan küper totaştırıp tora. Çitkär avılınnan yırak ta tügel Karurman başlana. Kärkeşlär bu urmannıñ çitendä genä yörilär. Urman eçenä bik kerep barmıylar. Çitkärlelär, kurkaklardan sanalmasalar da, urman eçen bik yaratıp betermilär.
Borıngıdan bik küp serle hikäyätlär yöri bu urman turında. İmeş, anda şürälelär dä, acdahalar da yäşi ikän. Ä kem urmannıñ eçenä ük ütep kerä, şul kiregä yulnı onıta ikän, dilär.