İnspektor

(hikäyä)
Fakt: idarädän çıgıp, 36nçı kvartalnıñ ber keçkenä genä çatına posıp urnaşuları buldı – berençe “kliyent” kilep tä “kaptı”.

- Bu “Moskviç” bezneke, - dide sercant Klip, äle radarın maşinanıñ energiyä çeltärenä totaştırmagan da kileş tegeneñ tizlegen çamalap. – Borılganda signal utların kabızmadı. Äye bit, iptäş leytenant?

Nuriyev, üzeneñ otryadındagı bu oyatsız, keşeleksez häm komsız sercant urınına başka berär yäş öyränçekne birülären sorap, naçalstvoga ällä niçä tapkır raport yazdı, läkin faydası bulmadı – Klip bügen dä anıñ belän ber ekipacga kuyıldı.

- Yarar, bar, tuktat, - dide leytenant, Klipnıñ mesken “Moskviç” hucasına barıber bäylänäsen belep.

Şundıy bändä inde ul – sercant Sklepov: keçkenä genä gäüdäseneñ gäüdä diyärlege genä dä yuk, ä gayrät kapçıgı töpsez; buyı, otryad komandirı kapitan Yomrıyıv äytmeşli, “käpäçe belän bergä sanaganda ber metrlap kına” bulsa da, eçendäge şapşagı korsagınnan taşıp tora; naçalstvo kuşkannı ütärgä disäñ, ul mokıt dönyasın onıta, tönen yoklamıy, aşaudan kala. Üsäse kilä anıñ. Şuña kürä tırışa. Läkin menä naçalstvo gına kürmi anıñ “batırlıkların”.

Menä ul maşinadan çıktı. Anıñ kırık öçençe ülçämle botinkalarınıñ urtalay diyärlek käkeräyep bögelgäne küzgä çalınıp kaldı. “Nigä şulay, üzen-üze gazaplap, zur botinkalar österäp yörergä, - dip uylap kaldı anıñ artınnan Nuriyev, - alay gına ayaklar zurrak kürenmi läbasa”.

Klip kulındagı “zebr tayagı"nıñ seltänüenä ük, yuldagı häräkät kagıydäläre taläp itkänçä, tuktarga tiyeş ide “Moskviç”. Ämma ul tuktamadı – gırıldap, äkeren genä uzdı da kitte. Tayagın kütärgän kileş aptıraudan avızı açılıp kalgan Klip, küzläre belän üze yanınnan uzıp bargan maşina artınnan iyärde. Nuriyev, ğadättägeçä, sercantnıñ vak-töyäk kılanmışların iğtibarsız kaldırırga künekkän bulsa da, bu yulı üze dä aptırap kaldı. Ha, gap-gadi ber trandulet, yul buyındagı GAİ maşinasın da, tayak belän kizängän inspektornı da “tfü sezgä!” digändäy sanga sukmıyça, tötene belän sasıtıp kitep barsın äle, aptıramassıñ!

Äle irtäräk bulganlıktan, uramda maşinalar da küp kürenmäde. Şuña kürä “Moskviç”nıñ tuktamavın intensiv häräkätkä dä, şunıñ arkasında bulgalıy torgan iğtibar tarkaulıgına da sıltap bulmadı.

Nuriyev şundıy uylar belän üze utırgan maşinanıñ işegen açtı da Klipka kıçkırdı:

- Utır, general, närsä basıp kattıñ? Kitkän, betkän... Şul sälämä artınnan kuıp kitmässeñ bit inde?..

“General” Klip, başına sugıp añına kiterelgändäy, “dert” itep borıldı da, kabalana-kabalana, “Lada”nıñ açık işegenä çumdı.

- Niçek inde, - dide ul ğadättän tış aptıragan kıyafäten yäşerä almıyça. - Bu bit küzeñä karap “sin käcä!” dip iğlan itü! Kölde bit inde bu bezdän!.. Nigä, şulay tügelmeni?.. Şulay bit inde!.. Min bulsam, bu nahalnı yahşı gına öyrätep alır idem tärtipkä... Bersen cibär, ikençesen... Ä bezgä närsä, zarplataga yäşärgä kalamı?

Nuriyevnıñ küzenä karamıyça gına takıldadı bolarnı Klip. Küzläre belän maşina kapotına yazılgan DPS digän yazunı “sözep” utırdı.

“Kayan kilä keşegä mondıy mänsezlek, - dip uyladı tagın Nuriyev, zavodlar yagınnan çıgıp kilüçe koyaşka küzlären kısıp. – Mondıylarga vlast birergä yarıymı soñ?”

Yaratmıy ul Klipnıñ şundıy kanıguların. “Şulay bit inde”, imeş...

Kua kittelär.

Yuk, Klipnıñ mıgırdanuı arkasında tügel, ä tege maşinanıñ gayre tabigıy küreneşe arkasında gına. Anıñ “Moskviç” ikänlege kuzov formasınnan gına şäylänä, ä östämä tyuningı anı urıs maşinası belän çit il markalarınıñ äkämät ber gibridına äyländergän ide.

Yırak barırga turı kilmäde, tege yünsez yul yörü kagıydälären tagın ber kat sanga sukmavın kürsätergä ölgerde. Äle bit niçek itep?! Dorfa itep, kıyu häm oyatsız räveştä! İkençe çatka barıp ta citte, svetofornı urmandagı korı kirtägä genä sanaganday, kızıl tös astında tırıldap uzıp ta kitte. Bu fakt inde Nuriyevnı da çıgırınnan çıgardı. Alar tegene, karşısına çıgıp, “migalka” belän häbär birdelär dä, yul kırıyına kıstılar. Telär-telämäs kenä, tuktap torırga vakıtım yuk digändäy, “Moskviç” bordyurga bärelep tuktap kaldı.

Tuktatkaç inde nıklabrak iğtibar itelde: “Moskviç” kına dimässeñ, täräzälärenä kara plenka yabıştırılgan; bamper aldında dciplarda gına bula torgan nikelle yaltıravık "kenguru"; faralar standart tügel, ä ällä nitkän formalı; artta – bagacnik östendä – samolet koyrıgın häterlätkän fantastik formalı spoyler; yarık kına açılgan täräzdän salmak, ämma avır muzıka işetelä. Älbättä, kimendä yegerme yıl elek yasalgan mondıy timer-tomır yomgagın bu “navorot”ları arkasında “trandulet” dip äytergä häzer inde tele äylänmäde inspektorlarnıñ. Häm mondıy “avto”da kem yörgänen dä çamalıy alar.

Mondıy maşina iyäse pensioner babay yäisä proletariat väkile dä tügel, gaişniklar tuktatmasın öçen iske maşina belän yöri torgan huligan yäisä avıl brigadirı da bula almıy. Mondıy maşinalar bik siräk bula, häm alarda üz markasına gomer buyı tugırı bulıp kalgan, gomer buyı şul markalı maşinada gına yörergä üz-üzenä ant birgän “model fanatları” yöri. Şuña kürä inspektor Nuriyev maşinadan ozın çäçle, yırtık dcinsılı, tişek krossovkalı, maşinalı yäşlege monnan yegerme-utız yıllar elek uzgan pläş “bayker” çıgar dip kötte. Andıylar maşinanıñ işegen şar yarıp açıp çıgalar da, äy, totınalar üzläreneñ zakonnı da, yul kagıydälären dä bozmavın, inspektornıñ alarnı tuktatuı säbäpsez buluın raslarga... Ämma bu yulı andıy häl kabatlanmadı.

Maşinadan iskitkeç zatlı kiyengän, zur şähärlärdä genä oçrıy ala torgan, gomere buyı sähnädän häm grimerkadan başkanı belmägän yäki yörgän yulı da sukmagı da mäktäp klassları gına bulgan intelligent hanım çıktı. Döreseräge, baştan maşinanıñ täräzäse açıldı da, annan yözendäge cıyırçıklarga mul itep grim sörtelgän, pudra sibelgän, küzlärenä yasalma kerfeklär östälgän hatın-kız yöze kürende. Ul yöz yılmaydı, kıp-kızıl perlamutr innekkä batkan irennär arasınnan, irenmiçä häm cällämiçä, berençe sälamnären sipterde:

- Ä, üzebeznekelär ikän! Yarıy äle tuktattıgız, mayor, - dip kul bolgadı ul.

Añlaşıldı: monıñ öçen dönyadagı böten militsioner – mayor yäki general.

Klip bik ere kıyafät belän maşinadan çıktı da, bötenesen instruktsiyä kuşkança itterep, dokumentlarnı tikşerü protsedurasına kereşte. Häzer kürsätä inde ul, madam, Sezgä “üzebeznekelär”ne! Bu anıñ iñ yaratkan şögıle. Bu şögıl – anıñ sorı tıçkan tormışınıñ iñ tämle mizgelläre. Bu mizgellärdä ul üz vazifalarınıñ kulminatsiyäsenä ireşä. Maşina dokumentların häm maşina iyäseneñ tanıklıgın anıñ kebek ber ük vakıtta däräcäle dä, täkäbber dä, sallı da itterep ber genä başka sercant ta, ber genä general da taläp itä almıydır.

Sırlı tayagın itek kunıçına kakkalıy-sukkalıy, kilep basa ul potentsial korbanı karşısına. Uñ kulın, cähät kenä cilterätep, furackasına tigezep ala da isemen atıy:

- Sercant Sklepov. Dokumentlarıgıznı kürsätegez äle!

Kulına eläkkän dokumentlarnı bu yulı da tegeläy-bolay äyländerde dä:

- Täk, täk, - dide, bäylänerlek häm ştraf çäpärlek säbäplärneñ tagın da kübäyüennän kanäğatlek belän avız kırıyın yılmayulı kıyşaytıp. - “Prava” – nindider

Haçkeryannıkı... Täk? Tä-ä-äk!.. Maşina da anıkı! Täk? Tä-ä-äk! Sezneñ, sudarınya, üzegezneñ berär dokumentıgız barmı soñ?

Älbättä, bar ul hatınnıñ dokumentları! Niçek bulmasın inde? Keçkenä genä sumkada baytak kına kapşangannan soñ ber dokument tabıldı.

- Närsä bu? – dide aptıragan Klip.

- Dokument! – dide anıñ “sudarınya"sı, şul uñayga sumkadan iyärep çıkkan közge kisägenä karap, çäç öyemnärenä törtkäli-törtkäli.

- Bu pasport bit! – dide anıñ bu kılanmışların üzennän kölü dip kabul itä başlagan sercant.

- Soñ! Dokumenttır bit inde?..

- Ä kayda soñ?

- Närsä kayda?

- Dokument!

- Ä bu närsä soñ sineñçä, mayor?

- Min mayor tügel!

- Kem soñ sin?

- Sercant!

- Molodets, zur üskänseñ! Ä dokumentlarıñ barmı?

- Başnı katırmasagız ide! Miña üzegezneñ maşina yörtergä hokukıgız turında dokument kiräk! Pra-va!

Hanım tagın sumkasına kerep kitte. Kürenep tora, ul kurıkmıy da, dulkınlanmıy da ide. Aña barıber bulsa kiräk: ällä vlast väkile tora karşısında, ällä kötüçe. Menä, nihayät, kapşana torgaç, kızıl tışlı ber dokument tabıldı.

- Menä, - dide hanım, küz karaşın kinät yul aşa yögerep çıgıp baruçı mäçegä taşlap. –

Oy, meskenem! Taptıylar bit inde... Menä minem tanıklıgım. “Üzebeznekelär” didem iç inde!.. Bu yarıydır bit?

Sercant koyıldı da töşte. Ul, bolay üze, vakıyganıñ agışın aldan analizlıy torgan keşe. Läkin kızıl tanıklık ni disäñ dä kızıl inde ul: şik tudıra, kızıksınu häm ihtiram uyata, şürlätä başlıy – kıskası, hätta sercant Sklepovnı da “ürä kat!” komandasına bastıra. Uylap kına kara menä, küz aldıña gına kiterep kara: kayandır ğalämät eşlekle kıyafät belän çıgarıp, borın töbeñä kızıl tanıklık törtsennär äle, häm anıñ kızıl tışında gerb mazar kebek berär şäp "ätäç başı" yasalgan bulsın di – reaktsiyäñ nindi bulır ikän? Şul şul! Kurkındıra şul! Şürlätä! Şikländerä! Bu yulı da, leytenant Nuriyev maşina täräzäseneñ pıyalasın töşerep, şunnan başın çıgargançı uzgan ike mizgel vakıt eçendä, Klipnıñ gäüdäse tegeläy sıgıldı, bolay borgalandı, ä canı, konvertka tıgılgan hat kisäge sıman, sigezgä bögelde. Çönki bu hatın kem genä bulmaska mömkin läbasa! Änä, ul kızıl katırgını iğtibarga layık bulmagan käğaz kisäge sıyfatında, ütä dä vayımsız räveştä pärtmänitenä taşlavın da taşladı, läkin “kaya, kaya, biregez äle, karıym” dip sorap kara añardan! Ä ul bälki prokuror fäländer! Bälki ul irtä tañnan gaişniklarga kompromat cıyarga çıkkandır! Sin anıñ tanıklıgın tikşerä başla, ä ul... mä siña – administratsiyädä bik väcni türä bulıp çıkmasınmı! Şulay uk gaişniklar yoklap yatmıymı ikän dip tikşerep yörüe mömkin.

Mömkin bit? Bik mömkin! Yä bulmasa, berär häyerçe curnalist kisägeder äle! Anısı da bulırga mömkin! Anısı da şul – gaişniklarnı tänkıytläp yazar öçen material cıyadır.

Sorap kara moñardan, “nindi organnardan soñ sin?” dip! Häzer nindi genä organnar yuk bit ul?! Barısınıñ da funktsiyäläre – tikşerü! Barısınıñ da “däülät kuygan ğalämät möhim dä ğadättän tış yäşeren burıçları” bar! İkençe yaktan... köpä-köndez, küz aldında öç tapkır kagıydä bozdı bit bu furiyä! Yarıy äle, häräkät intensiv tügel. Ä şunda ber-ike maşina çatta oçragan bulsa? E-he-he!

Klip şundıy ğadättän tış karşılıklı fikerlär arasında çualıp mätäşkän arada leytenant Nuriyev, kızıksınıp, maşinadan üze dä çıktı.

- Gafu itegez, hanım, - dide ul, kilep citügä. – Sez häzer genä svetofor yanınnan uzıp kitkändä, iğtibar itmädegezme, nindi tösle ut yana ide?

“Hanım” baştan Nuriyevnıñ küzlärenä tekälep kalgan ide, ä süz svetofor turında çıkkaç, “närsä soñ ul?” digändäy, borılıp, çattagı kızıl fonarlı baganaga borıldı.

- Andamı, - dide ul, iskitkeç gacäplängän ton belän. – May-o-or!

- General! – dide mıskıllı intonatsiyä belän Nuriyev.

- Ah, gafu itegez, iptäş general!.. Svetoformı?.. Töseme?.. Nindi bulsın, zäñgär ide inde! Bik karap yörim bit min. Sez närsä?

Klip tıyılıp tora almadı – pıfıldap kölep cibärde.

- Ä närsä, ışanmıysızmıni? İnspektorlar karşında kızılga kermäm iç inde, sez närsä, inspektor?!

- Zäñgär inde, alaysa?

- Äye, äye! Vallahidır menä!

Şul çak baya gına yul aşa bu yakka çıgıp citkän aklı-karalı yonlaç mäçe, bik küptän küreşmägän dustı kebek, tere butaforiyäneñ yanına uk kilde dä, yalvarulı tavış belän miyäulıy-miyäulıy, ayaklarına sarıla başladı. Kiñ kırlı galant eşläpäse östennän salıngan ozın yıfäk kosınkasın cilkä aşa artka seltäp, artistka citez genä iyelde dä mäçene koçagına kütärde. Annarı “general” belän “mayor”ga täfsilläp añlatırga kereşte: döres, maşina keşeneke; anıñ üzeneñ älege maşinaga dokumentları da, “prava”ları da yuk – anısı da hak; läkin bit anı gomerendä berençe häm, vallahidır, soñgı tapkır bulsın, Haçkeryan – anıñ arkasında Çallı qadär Çallıdan ber tön öçen kilgän dustı – maşinanı stoyankaga iltep kuyu turında gına ütengän läbasa! Menä şunı “iptäş ofitserlar” añlasınnar da, biçara hatın-kıznıñ hälenä kersennär ide inde!

- Yarar, bolarına ışandırdıgız da di, - dip, Nuriyev başka punktlarga küçmäkçe ide –

Klip tagın süzgä kilep tıgıldı:

- Ä vaşe-tı, bez häzer ük sezneñ bu “Mersedes”nı ştrafstoyankaga alıp kitergä tiyeş.

- Kölmägez! “Mersedes” tügel ul, “Volga”!

Nuriyevnıñ tagın Klipka açuı kabara başladı. Şuña kürä bötenläy şaytanı yanına olaktırgançı dip, anıñ iğtibarın başka obektka yünältergä buldı ul.

- Sklepov! Änä tege inomarkanı tuktat äle! İs kilmime – tikşer!

Klip añgıra tügel, üzençä näticä yasadı: bu karaçkıdan akça kısıp bulmagannı añlap, leytenant anı “ömetle, keremle” obektka cibärde bulsa kiräk. Älbättä, inomarkalarnı tuktatunı dönyadagı iñ rähät şögıl dip bulmıy. Täräzädän tıgılıp, kükrägeñä “puşka” terärgä dä küp soramıy alar. Läkin nişlämäk kiräk, komandir kuşkaç, çıgasıñ karşılarına, seltiseñ tayagıñnı – tuktarga boyırasıñ. Ä ul, “pşol tı, kozel!” digändäy, tizlegen dä kimetmiçä, vıct! sineñ yannan! Uzdı da kitte! Nu, bandit! Nu, abzar idäne astında tuıp, sazlıkta bakırdap üskän baka botı! Yarar soñ, monıñ üçen başka beräüdän alabız häzer...

Kulındagı mäçene maşinasınıñ täräzennän eçkä tıktı da dävam itte tege “lihaç” hanım:

- Ä sez miña kul seltägänne kürmädem min, çınlap kürmädem! Minem Haçik kürsäme monda çit ir-atlar belän gäpläşep torganımnı, oy, bette baş. Taşlıy ul mine... Zinhar, enem, ğayep takma inde!

- Yä, yarıy, kaysı stoyankaga kuyasız maşinanı? – dide Nuriyev, tämam tınıçlanıp häm hälne añlap.

- Änä iç, tege mäktäp belän yortlar arasında bar beräü. İke köngä urın tabılır äle digän idem...

- Alaysa, karşı kilmäsägez, üzebez iltep kuyarbız.

Bu täqdimne oşatmadı intelligent hanım. Oşatırsıñ, Haçigı çit irlär belän maşinaga utırıp kitkäneñne täräzädän kürep kalsa, bette bit baş! Taşlıy da kitä bit ul!

- Yuk, yuk, sez närsä?! Min üzem!.. – dide ul, näümizlänep, häm yärdäm öçen çiksez rähmäten dä belderergä onıtmadı...

- Sez, älbättä, üzegez dä buldırasız, süz dä yuk, - dide leytenant, kölemseräp. –

Läkin şulay da, tagın ber kat isegezgä töşerep karagız äle, Sez uzganda svetoforda nindi tös yana ide?

Yasalma kerfeklär arasındagı altmış yäşlek küzlär leytenantnıñ küz karaşı belän oçraştı:

- Soñ, zäñgär inde!

- Ä svetofornıñ tagın nindi tösläre bula, beläsezme soñ?

- Anısın sez belgäç, şul citkän inde, general...

Bu hanımnıñ şulkadärle gadilege, berkatlılıgı Nuriyevnıñ bolay da bulmagan agressiyäsen tagın da yomarlap kuydı. “Nişlätäseñ inde monı?! Gomer buyı ukıtuçı yäisä tabibä bulıp eşlägänder dä, kartayıp bargan könendä soñgı kabat çäçäk atıp karavıdır inde meskenneñ”, - dip uylandı ul, hanım belän yänäşä anıñ maşinasına taban atlaganda. İşekne açtı, başta anı uzdırdı maşinaga, annarı Klipka endäşte:

- Sklepov, bezneñ arttan barırsıñ!

Klip añlamadı. Döresräge, ber mizgelgä aptırap, yugalıp kaldı ul. Närsä digän süz inde bu, “bezneñ arttan barırsıñ”, imeş. Äle şul furiyägä şofer bulıp ta yalındıkmıni?! Ällä Nuriyevka akça väğdä itteme ikän? Mögayın, şulaydır... Nindi yünle inspektor bolay gına keşe kaygısın kaygırtıp yörsen di? Büleşsä yarıy inde, şaytan...

“Mersedes” dip ürtälgän, hanım öçen “Volga” bulgan kart “Moskviç” tıştan gına tügel, eçtän dä acgırıp torgan holıklı bulıp çıktı – Nuriyevnıñ akseleratorga basıp muftanı buşatuı buldı, başka mäskäüle yaktaşları kebek gırıldap, körsenep tormadı – çıyıldap kuzgalıp ta kitte. Kerügä, maşinanıñ eçke bizäleşe Nuriyevnı tagın ber kat gacäpländerde: idarä panele häm işeklärneñ eçke yagı yonlı hayvan tirese belän yabılgan, ayak astında yomşak keläm, rul törle töstäge yomşak ceplär belän ürelgän, utırgıçlar patşa tähete kebek kultıksalar belän cihazlandırılgan, hätta bardaçok kapkaçı da dekorativ figurka yärdämendä açıla torgan itep yasalgan.

- Sak bulıgız, tormozları naçarrak eşli bugay, - dip kisätte hanım inspektornı.

Nuriyev tormozga basıp karadı. Ästäğafirulla, dip, belgän-belmägän dogasın ukırga turı kilde, çönki tormoz, çınında, bötenläy diyärlek totmıy bulıp çıktı.

- Ruçnigın kullanıgız, - dip añlatma birep bardı buyangan apa. – Anısı tota! Minem

Haçik, üze äytmeşli, ekstremal bit ul.

- Yäş çagında kaskader bulmagandır bit?

- He, yäş çagında, imeş! Bez häzer dä kart tügel äle anısı!.. Yuk, inspektor bulgan ul, üzebezneñ keşe, ä nindi inspektor – kem belgän inde anısın... Maşina yörtergä mine ul öyrätte.

Nuriyev uylap kuydı: “Moña barısı da “üzebezneke”: ärmän dä, urıs ta, direktor da, inspektor da”.

- Yahşı uk “öyrätkän” ikän, - dide ul, avızın bik ük açmıyça gına, häm stoyankaga taba borıldı.

Tormozsız maşinanı boruları bik ciñel tügel şul. Şunda gına barıp citte leytenantnıñ başına: menä ni öçen tuktamıyça uzıp kitkän ikän bu!

- Gafu itegez, närsä didegez?

- Öyrätüen öyrätkänder, min äytäm, läkin öyrätep betermägän şul Sezne “inspektor”ıgız.

- Şulaydır şul, iptäş general, şulaydır, - dip kileşte anıñ belän hanım. – Öyränäse bar äle... Yörtäse kilä, anısı, kızık iç maşina yörtüläre...

Maşinanı kuyıp kaldırgaç, Nuriyev hanımnı “Haçigım kürmäsä yarar ide”lärenä karamastan, işek töbenä qadär kaytarıp kuydı.

- Kürsä inde... Äytersez, “bezneñ şähärdä häzer stoyanka kliyentlarına şundıy hezmät kürsätelä ikän” diyärsez.

Şulay dide dä, inde hanım GAİ maşinasınnan çıgıp citkändä genä nider isenä töşkändäy, östäp sorap kuydı:

- Ä şulay da, tege nindi tanıklık ul Sezdä?

Hanım, üz şähesenä iğtibarnıñ haman kimemüenä bik käyeflänep, sumkasına tıgıldı da annan kızıl tışlı tanıklıknı çıgardı:

- Karagız, kara, - dide ul, aldagı berdänber altın teşe belän yılmaep.

Nuriyev açtı, karadı, kürde: pensiyädäge ukıtuçı tügel, ştattan tış GAİ inspektorı ikän bu hanım!

- Gafu itegez, min monı alıp kalırga mäcbür, - dide leytenant.

- Alıgız, al, sezgä kiräksä... - dide hanım, ber dä poşınmıyça. Annarı uylap ta tormıyça östäp kuydı. – Haçik tagın yasap birer äle...

“Ştattan tış inspektor”nı işek töbendä kaldırıp kuzgalıp kitügä, Klip sorap kuydı:

- Tamdımı, iptäş leytenant? Barmı äzräk hezmät hakı?

Nuriyev anıñ avızın tiz tomaladı:

- Beläseñme, kem bu?

- Ä kem?

- İnspektor! Añlıysıñmı, in-spek-tor! Äydä, maşinalar kübräk yöri torgan urınga kittek!

Klip “Bez kem...” dip avız aça başlagan ide – Nuriyev açtırtmadı:

- Äydä, äydä! Bezgä digäne bulır äle. İnspektor bulmaganı da küp bit halıknıñ...

"Beznekelär bit ul!" kitabınnan