Butagan

(yumoreska)
İskändärneñ bügen käyefe yahşı, dönyası tügäräk ide. Nişläp şulay bulmasın, eşläre görläp bara, sälamätlegenä zarlanmıy, ğailäsendä iminlek...


Ğailä digännän, bügen irtän hatını: «Otgul aldım, köne buyı öydä bulam»,- digän ide. Kaya, şaltıratıp hälen belim, närsälär maytara ikän, dip, İskändär telefonga yabıştı. Ğadättägeçä, telefon töymälärenä «şalt-şolt» basıp, nomer cıygaç, trubkada pipeldägän tavış işetelep tordı da, İskändärne gacäpkä kaldırıp, nindider yat irneñ: «Ale»,- digän karlıkkan tavışı yañgıradı. İskändär kauşavınnan ni diyärgä dä belmäde. Barı tik:

- Miña Cämilä kiräk ide,- dip kenä äytä aldı.

Ä üze küñelennän: «Kem ul? Nişläp trubkanı Cämilä almadı ikän?»- dip uyladı.

- Närsägä siña Cämilä?

Telefonnan söyläşüçe muciknıñ tavışı katgıy ide. İskändärneñ şaltıratuına beraz gına açuı da kilgän kebek. Yugıysä, kem kemgä açulanırga tiyeşter bit?..

- Kiräk ide! Çakır telefonga üzen!

Tege adäm dä bireşergä cıyınmıy, beraz endäşmi torgaç:

- Kem sin? Nigä kiräk siña Cämilä?- dip soradı ul.

Vät nahal, närsä dip tora bit! İskändär üz-üzen kulga alırga tırıştı. Şulay da, dulkınlanudan anıñ tavışı kaltırana başlagan ide inde.

- Min anıñ zakunnıy ire, bik beläseñ kilsä. Ya, küñeleñ buldımı? Ä häzer tiz genä Cämiläne çakır!

Trubkadan tege irneñ kıçkırıp kölgäne işetelde.

- Ha-ha-ha! İre? Cämiläneñ ire yuk anıñ...

«Bolay bulgaç, min öydä yukta hatın çitlär belän çuala inde. Bu cirbitkä, irem yuk, dip, aldagan, dimäk», digän uy yaktırıp aldı İskändärneñ baş miyendä.

- Närsä hahıldıysıñ? Häzer kaytam da muyınıñnı borıp, başıñnı kesäñä tıgıp kuyam bit,- dip cikerde ul trubkaga.

Tik tege baştagı mucik keşnävennän tuktamadı.

- Tege dönyadan kaytkan keşe yuk äle häzergä,- dide ul, artık ise kitmi genä.

Älege süzlär İskändärne bötenläy çıgırınnan çıgardı.

- Isluşi, sin kayçannan birle Cämilä belän çualasıñ?- dide açuına buılıp.

- Küptännän oçraşabız. Şunnan ni äytmäkçe bulasıñ?

Dimäk, İskändär küptän «mögez yörtä» bulıp çıga inde. Kayber könnärdä, eştän kaytkanda, hatınınıñ küzläre may aşagan mäçeneke şikelle yaltırap toruınnan şiklängälägän ide anı.

- Kön sayın oçraşasız ştoli?

- Poçti. Kuna kalgan könnär dä bulgalıy. Äle bügen dä...

- Tukta, tukta, niçek inde bügen dä?

- Ä menä şulay, bügen dä min anıñ yanında kundım.

İskändär aptırap kaldı. Niçek bula soñ bu? Ul üze bügen hatını kuyınında yokladı tügelme soñ? Ä bu cirbit Cämilä yanında kundım, di.

- Äyt äle, agayne, telefon nomerıgız niçek anda sezneñ?

- İke, utız dürt, ille altı!

Bu alar telefonınıñ nomerı tügel bit! İskändär, şunda gına, telefon nomerın butaştırıp cıyganın añlap, botına çabıp kuydı.

- Tfü, şaytan, nişläp başta uk şulay dimiseñ anı, başnı butaştırıp yatasıñ?

Ul kabat aşıkmıyça gına öy telefonınıñ nomerın cıydı. Ozak ta ütmäde, trubkadan Cämiläseneñ bılbıl sayravına ohşagan yagımlı tavışı işetelde...