Тачир Аташов

  Аташов Тачир Ибрагьиман хва 1992 йисуз октябрдин 2-даз Кцӏар райондин Гуьндуьзкӏеле хуьре дидедиз хьана. Хайи чӏалал ашукь тир жегьилди иер-иер шиирар кхьизва. Сифте яз «АЛАМ»да басма жезва. Адан шиирар кӏелайла са дуру чешмедин виляй ргазвай руьгь аквада заз. Хъсан шаир жедайдал чӏалахъ я зун.
  
  "МАРВАР"
  
  Лезги хуьре гьар са кӏвале
  
  Лезги хуьре гьар са кӏвале,
  Даим мехъер, шад мел хьурай.
  Беракат хьуй чи Ватанда,
  Кьулан вацӏухъ гур сел хьурай.
  
  Шагьдин винел элкъвез лекьер,
  Цавун чина шадвал хьурай.
  Чӏехи хьана, лезги хуьрер,
  Чи рикӏериз сувар гъурай.
  
  Бахтавар тир шад суфрадал,
  Гьич иблисдин ял тахьурай.
  Шад,кубан хьуй халкьар вири
  Чилин винел къал тахьурай.
  
  И Тачираз кан я Ватан,
  Зи деврандал чӏал тахьурай.
  Ватан я зи, рикӏин дарман,
  Зи Ватандал чӏал тахьурай.
  
  Мехъер я хуьре
  
  Вуч ийер я зулун бере,
  Уях хьанва къе чи дере.
  Алатна ван далдам - зуьрне,
  Лезги хуьре мехъер я къе.
  
  Кӏватӏ хьанва хуьр чамран гъенел,
  Жигьил рушар хунча кьилел,
  Хуш хъвер ала сусан сивел,
  Лезги хуьре мехъер я къе.
  
  Свас иер я бишме алай,
  Гъиле чирагъ енге галай,
  Чамра чанда ава гур цӏай,
  Лезги хуьре мехъер я къе!
  
  Нянин кьиляй жеда демер,
  Хуш манийрин къведа ванер,
  Жигьил дустар ийиз къуьлер,
  Лезги хуьре мехъер я къе!