Latin

Шиирар - Саидмет Самури

Total number of words is 387
Total number of unique words is 258
0.0 of words are in the 2000 most common words
0.0 of words are in the 5000 most common words
0.0 of words are in the 8000 most common words
Each bar represents the percentage of words per 1000 most common words.
Къакъатзава чун
Къванцяйни акъатда цуькведин пириш,
Вахтунин, вядедин макьам хьайила.
Накъвари атӏуда хъуькъверал нехиш,
Къакъатунин тӏалди гуьгьуьл кайила.

Туькьуьл я, залан я чаравилин дерт,
Замандин гьарайди къакъудзава чун.
Эй зи жегьил дустар, анжах жемир перт,
Ватандин къужахди агудзава чун.

Лув гана акъатда шарагни мукай,
Дар хьана аквада аялдизни кьеб.
Замандин къанундиз вуч жеда чавай,
Гьаятдихъ галкӏун я къакъатун себеб.

Къакъатун, агатун-са рекьин кьве кьил,
Уьмуьрдин гъалуни арушна кьунвай.
Кӏани дустарикай атӏудани вил?
Вучда на гьижрандиз чун къакъудзавай?!

Гуьзел акуртӏани тарарал цуьквер,
Багьади язва, дуст, къимет бегьердин.
Заланди ятӏани гьижрандин дердер,
Бине я кутазвай цӏийи уьмуьрдин.

Чарабур хьайитӏан кьисметдин рекьер,
Хайи чил рикӏелай алат тавурай.
Чарабур тахьурай анжах чи рикӏер,
Анжах Ватандивай къакъат тавурай.





Хуш я рикӏиз
Дагъларал алтӏушна секин я цифер,
Туьнт туракь рангада гьатнава чуьллер.
Гъетерин ишигъдик цӏарапӏар квачиз,
Авачиз санайни са гьарай, эвер,
Шириндиз рахазва гуьгьуьлда гьиссер,
Ажеб хуш я рикӏиз гатфарин йифер.

Гьуьлуькай хкатна хъишивал галаз,
Явашдиз нур пайиз хкаж жезва варз.
Кьуд патахъ чикӏизва цуькверин атир.
Нушиз тӏебиатдини агъзур жуьре наз,
Шириндиз рахазва гуьгьуьлда гьиссер,
Ажеб хуш я рикӏиз гатфарин йифер.

Секиндиз юзазва тарарал пешер,
Авазва гьар пата къушарин сесер,
Гьавадихъ галазва шагьвардин нефес.
Алудна рикӏелай вири пис шейер,
Шириндиз рахазва гуьгьуьлда гьиссер,
Ажеб хуш я рикӏиз гатфарин йифер.




Шагьдагъ
Дагъдин цуьквер алван я,
Гьар са тӏалдин дарман я.
Гьатин дагълариз рекье,
Дагълар лекьрен макан я.

Шагъдагъ чилин дамах я,
Чарчар булах авахьиз.
Шагьдагъ элдин даях я,
Шагьвар гьанрихъ алахьиз.

Ракъин нурдикай къачуз,
Живер авахьиз вацӏуз,
Дагълар цӏиргъина авай
Гуьзел я гьар са чӏавуз.

Кӏанид патав хьайила,
Дагълар хуш жеда рикӏиз.
Нуш я ашкъидиз дуьня,
Уьмуьр ракъурмир текдиз.

Шагьдагъ чилин дамах я,
Чарчар булах авахьиз.
Шагьдагъ элдин даях я.
Шагьвар гьанрихъ алахьиз.





Хайи ватандиз
Куькӏуьрна вил кьуд патахъди килигна,
Хуш я рикӏиз мани лугьун ватандиз.
Илгьамдин цӏа чарни къелем гъиликна,
Хайи чилин тӏвар чукӏурин жагьандиз.
Хуш я рикӏиз мани лугьун ватандиз.

Шад манидин ван акъудиз къушари
Саф рикӏера ашкъидин цӏай курзава.
Хайи элдин гадайрини рушари
Цӏийи салар, цӏийи багълар хьурзава.
Саф рикӏера ашкъидин цӏай курзава.

Чи зегьметдин бегьер аку, бар аку!
Девран-гуьзел, бахтавар я инсанар,
Ашукьдив гвай чуьнгуьр аку, тар аку!
Къвезва чиниз гьар патахъай мугьманар.
Девран-гуьзел, бахтавар я инсанар.

Фикир-азад, гуьгьуьл-шад инсан я зун,
Зи нефесдин ялав, чан я вун, Ватан!
Ви арандал, ви дагъдал гьейран я зун,
Зи шииррин макьам, ван я вун Ватан!
Зи нефесдин ялав, чан я вун, Ватан!
You have read 1 text from Lezgian literature.