Latin

Шиирар - Гьасан Хасиев

Total number of words is 626
Total number of unique words is 463
0.0 of words are in the 2000 most common words
0.0 of words are in the 5000 most common words
0.0 of words are in the 8000 most common words
Each bar represents the percentage of words per 1000 most common words.
Яйлахда
И булах вуч хъсан серин я, ухвайш!
Гьамга яд вирт хьиз ширин я, ухвайш!
Килига дагълариз, кьакьан дагълариз,
Дерейриз гуьзета, дерин я, ухвайш!

Кьуд пад къунва алван-алван цуьквери,
Мел кутунва тик гуьнейра нуькӏери.
Эгьей! Ша, сувар я, дагъларин сувар!
Хабар ганва кӏамай, тамай къветери.

Силибир диганва, саки цӏийи чам,
Акъатна зи рикӏяй ингье, дертни гъам.
Лезги руш, минет хьуй, «Перизада» лагь,
Ягъ, гада, вунани «Лезгинка» макьам.

Акуна Лаца заз гьуьрметлу мугьман,
Вуж ятӏа лугьун квез, ам Асеф Мегьман.
Тукӏунвай кӏвачерик вижевай са гьер,
Кӏватӏ хьанвай хуьрерай пара кьван инсан.

И чӏехи манидар, и шаир мирес,
Чи халкьдин, чи элдин дамах тушни бес?
Гардан кьуна, темен гана хъуьхъвериз,
Атана зи чандиз цӏийи тир нефес.

Рикӏелни хкана Забит муаллим,
Шумуд са къагьриман, шумуд са алим.
Шарвили вилеркай цӏай хьиз хкатна,
Вич инал алайди авуна малум.

Нисин чӏавуз, гатун чими береда,
Чуьнгуьрдин ван гьатна Гавдан дереда.
Асеф стхад ягъазвай «Ахцегьар»-
Машгьур мани Къубадани Куьреда.

Са легьзеда и манидин хуш аваз,
Шалбуз дагъдив агакьнавай гар галаз.
Шагьнабатдин, Самурдин циз хвеши тир,
Авахьзавай и гьавадин ван алаз.

Зи дамарар юзурна и макьамди,
Кӏвачер хьана куьлуьн патал тӏарамди.
Лекьер, картар хкаж хьана цавариз,
Капар яна гьар камуни, уламди.

Лезги ватан, зун азад тир са къуш я,
Куьз лагьайтӏа, ви яд, ви фу заз нуш я.
Зун дагълара чӏехи хьанва къегьал хьиз,
Яшамишун, яратмишун заз хуш я.




Ахьтин чка акунач
Акӏ хьанай заз жув накьанан аял хьиз,
Диде акваз акъатнай рикӏ, кьве вилни.
Йисар фенвай, амма ширин хиял хьиз,
Дагъдихъ галаз рехи хьанва зи кьилни.

Аладашдал зи зегьметдин гел ала,
Зи пелен гьекь, кӏвачин жигъир, нефесни.
Аладашдал мехъер ала, мел ала,
Ава элдиз яшамишдай гьевесни.

Аладашдин къацу камар, пелерни,
Виш сеферда за кӏвачерай акъудна.
Чубанвална хвена хипер, кӏелерни,
Кӏвалин дердер яваш-яваш агудна.

Балкӏан гьална дагъдин четин рекьерай,
Дергесни кьуьк, гагьни нажах хьана зав.
Гатун юкъуз чанда гьатна ифин, цӏай,
Хъуьтӏуьн цикӏиз гъилер-кӏвачер хьана дав.

Хкет, кьиса, риваятар виш жуьре,
Лезги махар, мисаларни гьа кьадар.
Суьгьбетчияр тӏимил авач чи хуьре,
Марагъдалди яб гудайбур са кьадар.

Мана ава чи патарин гафара,
Мисал патал, къачун чна «Мисид кӏам».
Малар хвена нехирбанри чӏафара,
Гьахъ лагьайтӏа инаг гъерид, нисид кӏам.

Ина йикъар саки ширин са мани,
Ина уьмуьр багьади я гьавиляй.
Ина инсан адалатлу, гьахъ кӏани,
Ина рикӏер чӏехиди я дагъдилай.

Амукьзава даим элдин къайгъуда,
Карчи инсан Сабир хьтин рухваяр.
Кьада гъилни, жедай куьмек къалурда,
Гьабур тушни дагъдиз ухшар архаяр!

Асфальт тунва дагълара кьван рекьера,
Цӏалцӏам я къе, туш накьанан завал хьиз.
Амач чухур, кесекни къван рекьера,
Хкаж хьана гьалчӏ жезамач чувал хьиз.

Дагълариз фин, ацукьа зи машинда,
Аладашди гуьзетзава вун атун.
Ахьтин чка акунач ваз яшинда,
Гьейран хьана артух жеда ви кьатӏун.




Дагъвидин гаф
Кӏанивили зак са хесет кутуна,
Гьар пакамахъ рекье гьатда дагълариз.
Лап кьуьне зи гъилер - кӏвачер кутӏуна,
Кӏарна епер мадни катда дагълариз.

Ваъ, Межнун хьиз дилини туш, есирни,
Чуьлда жедай вичеллачиз датӏана.
За уьмуьрдин мана-метлеб ва сирни,
Дагъдин синел, дагъдин рагал кьатӏана.

Дагъ - чилерал виридалай кьакьанди,
Им гьуьжетсуз гьакъикъатни, герчеквал.
Дагъвидин руш виридалай хъсанди,
Малаикдиз авач адан гуьрчеквал.

Къацу тул я зи халича, зи сумаг,
Сарай хьиз я жуван литин алачух.
Кӏвачел шалам, гъиле къада за чумахъ,
Хуьда суьруь, гуьгьуьл шад яз, рикӏ ачух.

Килиг дагъдиз такабурлу, абурлу,
Адаз къилих дегишарун четин я.
Дагъ акуна, хьана зунни сабурлу,
Гьавиляйни гьамиша зун секин я.

Кфилдин ван галукьайла япарихъ,
Гуж къведа заз, чанда амукьдач суза.
Чӏалахъ жемир идан-адан тапаррихъ,
Дагъ женнет я, ина кефер чӏугда за.

Шукур хьурай, хъсан бахтар ава захъ,
Дагъдин патав экӏя хьанва хайи хуьр.
Шак алачиз, рикӏивайни я чӏалахъ,
Дагълариз кьван яргъи жеда зи уьмуьр.

Цуьк ийида жив ацукьай тегьерда,
Гьар гатфарихъ хуьруьн майвад багълари.
Дарих жеда зун хьайила шегьерда,
Магнитди хьиз ял хъийида дагълари.

«Баку! Баку!» - лугьудайбур гзаф я,
Ша, куьне зун нагьахъ кьиляй акъудмир.
Дагъвидинди чӏуриз тежер са гаф я:
«Зун дагъдивай, дагъни завай къакъудмир!»
You have read 1 text from Lezgian literature.