Latin

Шиирар - Дильмира Ашурбекова

Total number of words is 568
Total number of unique words is 320
0.0 of words are in the 2000 most common words
0.0 of words are in the 5000 most common words
0.0 of words are in the 8000 most common words
Each bar represents the percentage of words per 1000 most common words.
Зи рикӏин мурадар
Михьи гьава Каспи гьуьлел,
Бул-берекат лезги чилел,
Экуь,ислягь цавар кьилел,
Хьун я,зи рикӏин мурадар!

Кутур багъда дадлу нямет,
Гьар хизанда хатур-гьуьрмет,
Кӏанибур чеб-чпиз кьисмет,
Хьун я,зи рикӏин мурадар!

Рикӏе гьардан къени къастар,
Дуьньяд винел шад тир вахтар,
Чи балайриз ширин бахтар,
Хьун я,зи рикӏин мурадар!

Кьилел туьхуьн тийидай рагъ,
Шарвилияр далуйрихъ дагъ,
Гьар са миллет уьмуьрда сагъ,
Хьун я,зи рикӏин мурадар!

Чи арада аваз садвал,
И дуьньядал чаз азадвал,
Гьар са хуьре анжах шадвал,
Хьун я,зи рикӏин мурадар!




Дидедин хайи йикъаз
Хайи йикъан ви шад межлис рикӏеваз,
Мубаракиз атанва чун,диде ваз.
Экуь дуьнья чаз къалурай рагъ диде,
Вун акурай чаз гьамиша сагъ,диде!

Ширин диде,женнет багъдиз тир ухшар,
Пудкъанни цӏуд хьанава къе ви яшар.
Мекьи чӏавуз чаз чим гайи гад диде,
Кьисмет хьурай ваз гьар са югъ шад,диде!

Гегьенш хьана рикӏе авай хиялар,
Бахтлу яз,ваз акурай ви аялар.
Ваз акуна шад мехъерар хтулрин,
Баде хьурай,диде вакай птулрин!

Вун галачир гьар са югъ чаз серин я.
Куьз лагьайтӏа,вун веледриз ширин я.
Диде чан,вун чи уьмуьрдин даях я,
Вун,веледрин куьтягь тежер дамах я!

Тикрарбенд

Ширин диде,вун хайи
Югъ,мубарак хьурай ВАЗ!
Сад Аллагьди,чан сагъ яз,
Яргъи уьмуьр гурай ВАЗ!

Диде чан,ваз дердер мад
Ахварайни такурай!
Вун веледриз гьамиша
Шад-хурам яз акурай!




Халичадал
За хразвай халичадал,
Гьар жуьредин гуьлер ала.
Кӏани ярдин буй-бухахдал,
Са шумудан вилер ала.

Цава авай экуь гъетер,
Экв гуз,чилиз куькӏуьрзава.
Кӏани ярдин чӏулав вилер,
Сефил яз зал туькӏуьрзава.

Багъда авай къизилгуьлер,
Куь атир хъваз,шез кӏанзава.
Зид уьмуьр туш,я чан эллер,
Бахтлу инсан жез кӏанзава.




Зи хиялар
Зун сефил яз къекъведайла чилерал,
Хиялрикай цфер жезва цаварал.
Уьмуьр акур чӏавуз мичӏи вилерал,
Валлагь,вахар,рикӏизни кваз тӏар жедай.

Тамашайла гьуьлуьн гегьенш сегьнедиз,
Хиялри зун чӏугваз хьана дегьнедиз.
Рикӏин сирер чир хьанайтӏа дидедиз,
Каспи гьуьлел секин тежер гар жедай.

Рикӏе гьатна агъзур жуьре хиялар,
Зи жегьил чан,кичӏезва заз жез ялар.
Бахтлубур хьун паталди зи аялар,
Сад Аллагьдин патай кӏани яр жедай!

Хиялар зи-рикӏин кӏусар-куьрпеяр,
Къекъвезва куьн цаварани чилерал.
Хиялри зи чукӏур ийиз лепеяр,
Акъваз тийиз сирнавзава гьуьлерал.




Манийрин устӏар
Суьлгьуьят хала-я чи берекат.
Къурмишзавай чаз сегьне,мярекат.
Рикӏерин дердер алудзавай фад,
Сад Аллагьди вун авурай ман шад!

Вун я манийрин халисан устӏар,
Вири Къавкъаздиз машгьур я ви тӏвар.
Кьилиз акъатун патал ви къастар,
Лезги халкьди ваз лугьузва тостар!

Суьлгьуьят хала-диде хтулрин,
Къуй вакай хьурай баде птулрин.
Сад Аллагьди чаз свас хьиз хуьрай вун!
Таза бегьердин таз хьиз хуьрай вун!

Къуй ви уьмуьрди мадни гъурай цуьк,
Шад ийизвай чи гьар са касдин рикӏ!
Суьлгьуьят хала,цав хьиз тир ачух,
Ви манияр хьуй мадни чаз артух!





Сулейман Керимоваз!
Еке къимет гузва за Ви дидедиз,
Вун хьтин хва ханавай и дуьньядиз!
Гележег йиз алахънавай чи хъсан,
Чи дамах я!-Вун Керимов Сулейман!

На лекьре хьиз гана къуват лувариз,
Чи АНЖИДИН тӏвар хкажна цавариз!
Четин чӏавуз жуван халкьдиз гуз куьмек,
Гьар са карда,Сулейман Вун я зирек!

Агъзурралди куьмекна На екедиз,
Чи мусурман халкьариз физ МЕККЕДИЗ!
Эй Керимов Сулейман,Вун гьуьрметлу
Са инсан яз,чизва вири уьлкведиз!

Сагъар ийиз начагъзавай аялар,
Куьмек гун тир Ви рикӏевай хиялар!
Эй Сулейман!-лугьузва Ваз вирида,
Аферинар,гьам куьлуьда,ирида!

Вун,Керимов Сулейман-чи дамах я!
Шарвилидин гъалибвилин пайдах я!
Халкь паталди чӏугвазавай зегьметар,
Аллагьди Ваз мадни гурай девлетар!

Эй Сулейман!-халкьдихъ галаз сир сад яз,
Дуьньяд винел,уьмуьрда Ви рикӏ шад яз,
Хайи халкьдин рикӏе авай мурад яз,
Сад Аллагьди,яргъи уьмуьр гурай Ваз!
You have read 1 text from Lezgian literature.