Latin

Марсел Ризаев

Total number of words is 498
Total number of unique words is 352
0.0 of words are in the 2000 most common words
0.0 of words are in the 5000 most common words
0.0 of words are in the 8000 most common words
Each bar represents the percentage of words per 1000 most common words.
Марсел Ислеманан хва Ризаев (Марсел Испикви) 1984-йисан 29-апрелдиз Стӏал Сулейманан райондин Цӏийи Испикрин хуьре дидедиз хьанва. Гьеле хуьруьн мектебда кӏелзавай аял вахтарилай эгечӏна Марсел Ризаева вич хайи чӏалал, литературадал, тарихдал, медениятдал рикӏ алайди яз чирна. Гьа икӏ, 6-классда ада сифтегьан «Марф» шиир кхьена, 9-классдилай адан шиирар «Лезги газетдиз», гуьгъуьнлайни «Самур» журналдиз акъатиз хьана.
Университетда кӏелдай йисар жегьил шаирдин туькӏуьрунарин рекье мадни бегьер гъайибур хьана; кӏелунин сифтегьан йисарилай кьил кутуна Марсел Ризаев Дагъустандин газетринни журналрин карханайрихъ галаз сих алакъайра хьана, интеллигенциядихъ галаз мукьувай таниш хьана. Алай вахтунда Марсел Ризаева Испикрин хуьруьн мектебда лезги чӏаланни литературадин тарсар гузва, “Хважамжам” тӏвар алай литера­ту­ра­дин кружокдин регьберни я. Райондин телевиденида (КТВ) лезги халкьдин медениятдиз, эдебиятдиз, тарихдиз талукьарна лезги чӏалалди вич автор яз «Ачух суьгьбет» тӏвар алай телегунугни арадал гъизва.

Эйваз Гуьлалийрин

Марф

Къукърумдин ван гьатна секин япара,
Цавун кьуд пад чӏулав хьана циферив.
Тамам йиф тир, халкьар авай ахвара,
Цӏайлапанди кудна ахвар гъилерив.

Экӏяй хьанвай чилел алай пурпу руг,
Баябан тир цихъ къаних яз куьчейра.
Циферивай, цава кьунвай яд хурук,
Хьанач эхиз, къурна ириз гуьнейра.

Садлагьана цавун аршдай тӏвалар хьиз,
Ириз-ириз гур стӏалар аватна.
Тик дагъларай цӏуьзвай кьакьан кьвалар хьиз,
Цихъ къаних тир чилелай руг алатна.

Марф хура тур цӏайлапандин эквери
Мичӏи йифни девран йикъав агудна.
Яд фейивал амукьай шак гелери
Чилеравай кьар-палчухар акъудна.

Марф! Вуч гужлу я вахъ авай а къуватар?
Вун дуьнядал хийирни я, зиянни.
Вахъ гьуьжет яз авач халкьдихъ такьатар,
Заз сир туш, канни я вун, таканни!

Лезги чӏал

Дидед чӏал, - вун дидени я, ватанни,
Муг авуна уьмуьр физвай маканни.
Ви тарихдиз, гележегдиз зи чанни
Багъишда за мулдин цуьк хьиз канидаз.

Зи халкь,зи чӏал са чӏавузни ажуз туш,
Намус-гъейрат девлетдихъни къачуз туш.
Зи лезги чӏал, - дидед чӏал заз ялгъуз туш,
Къадим тарих вахъ амай кьван, лезги чӏал!

Зун лезги я, дидед чӏалан векил я,
Чӏалал зегьмет чӏугвазвайди кьве вил я.
Лезги чӏалахъ пехил ксар сефил я,
Сергьят авач ви девлетриз, лезги чӏал!
Диде, гьуьрмет, берекат ва лезги чӏал, -
Мектебда чаз гайи тарсар ибур тир.
Диде хьиз заз кан хьанай зи лезги чӏал,
Къаст эцигнай чирда лугьуз адан сир.

Зун я векил дидед чӏалан илимдай
Жуван уьмуьр, акьул чӏалаз багъишай.
Зи лезги чӏал багьа я заз виридалай,
Илим, тарих, - вири я вун, лезги чӏал!


Зул

Акъатна гад, чими ракъар багъишай,
Йисан вахтар тӏебиатдин суьрет я.
Акваз-такваз дагъдин къамат дегишай,
Къайи шагьвар, яд-къарасу - девлет я.

Алукьна зул – къизилдин ранг лишан тир,
Таму, тара дегишарна либасни.
Кьезил шагьвар, чуьлда авай хупӏ атир,
Пеш гадариз кьулухъ тушир са тазни.

Чуьлда цанвай никӏер хуьруьн колхозди, -
Гатун зегьмет, - кӏватӏна вири куьмекдив.
Вахтар хьанва никӏер, багълар, салазни
Перер ягъиз, гъарар гудай гьуьрметдив.

Гагь чигеди, гагь марфади арабир
Дамахдивди рагъ цифедив кӏевирда.
Накь чим гайи хъуьтуьл гьава, адан сир
Къе къуза яз яйлах тирвал къекъуьрда.

Са вахтара дагъдин кьиляй – цаварай,
Гьалтда лацу дурнаяр са цӏар хьана.
Зулун мекьи гьавади хупӏ ахварай
Авудна чеб рекье тунвай тӏар хьана.

Зулун йикъар – чуьлдин гуьзел акунар,
Сад-садалай аквадачни гуьрчег яз!
Яд кужумна кьеженвай пеш – ви гьунар,
Перишандиз аквада вун керчек яз.
You have read 1 text from Lezgian literature.