Latin

Шиғырҙар - Фәүзиә Ҡотлогилдина

Total number of words is 369
Total number of unique words is 283
41.3 of words are in the 2000 most common words
51.4 of words are in the 5000 most common words
61.5 of words are in the 8000 most common words
Each bar represents the percentage of words per 1000 most common words.


Башҡортостан

           
Рәсәйемдең ҡуйынында
Тыуған илем Башҡортостан,
Уның йылы ҡосағына
Бик күп төрлө милләт һыйған.

Береһе лә үгәй түгел,
Барыһына ғәзиз әсә,
Уңдырышлы тупрағынан
Һуттар алып улар үҫә.

Бер милләт тә юғалмаған
Башҡортостаным эсендә.
Һәр бер кеше һөйләшә лә,
Һәм йырлай ҙа үҙ телендә.
 
Тәбиғәте гөл баҡсалай,
Урмандар күп, ҡая тауҙар.
Ни теләйһең, барыһы бар,
Йәйрәп ята киң баҫыуҙар.

Башҡа яҡта оҙаҡ йөрөп,
Башҡортостаныма керһәм,
Алыҫтан уҡ күренә бит
Республикам ниндәй күркәм!

Ауылдарҙа матур өйҙәр,
Шифалы шишмәләр һыуы,
Һағындыра хатта уның
Һулай торған саф һауаһы!

Баҫыуҙарҙа иген үҫә.
Тирә-яҡта киң туғайҙар,
Ғәзиз еремде һуғарып
Ағып ята күп йылғалар.

Дуҫлыҡ иле Башҡортостан,
Ожмах иле Башҡортостан,
Ошо илемде һағынам
Әҙ генә мин ситтә торһам.

Илем йөрәге ҡалалар
Республикама көс бирә,
Башҡаламда зыялылар
Тыуған илемә төҫ бирә.

Ҡунаҡсыл булыуы менән
Рәсәйҙә ҙур урын тота,
Халыҡсан бейеү, йырҙары
Донъяға данын тарата.

Һине маҡтап туялмайым,
Тыуған илем Башҡортостан,
Донъялағы матурлыҡтың
Барыһынан өлөш сыҡҡан.

Әлеге булған даныңды
Һаҡла, илем Башҡортостан,
Башҡорт иле һәр ваҡытта
Бар халыҡҡа булыр дуҫтан!







БУРЫС

 
Тыуған телем башҡорт теле минең,
"Әсәй" тиеп телем асылған,
Был донъяның барлыҡ матурлығы
Ошо телем аша танылған.

Телебеҙҙе быуат төпкөлөнән
Мираҫ иткән ата-бабалар,
Юғалтмайыҡ тыуған телебеҙҙе,
Һүҙ әйтәлмаҫ телһеҙ балалар!

Башҡорт теле - тыуған телем минең,
Башҡортостан - минең баш йортом!
Тыуған илебеҙҙә тыуған телдә
Һүҙен әйтһен һәр бер башҡортом!

Балаһына тыуған тел өйрәтеү-
Һәр әсәнең изге бурысы!
Онотмаһын ине бер әсә лә
Иңдәренә төшкән бурысты!

Ситтән генә ҡарап ятмаһындар
Балалары булған һәр атай,
Телен өйрәтһендәр ейәндәргә
Һәр өләсәй, һәр бер олатай!







ҠӨРЪӘН

 

Бөйөк Аллаһ Рамазанда
Ергә Ҡөръән индергән,
Кешелеккә йәшәр өсөн
Юлын күрһәтеп биргән.

Ҡәҙер кисе Пәйғәмбәргә
Тәүге аяттар килгән,
Егерме өс йыл буйына
Ҡабул ителгән Ҡөръән.

Бүләк итеп ғүмер биргән
Атай-әсәйҙәр аша,
Әсәйҙе бик хөрмәтләргә
Ҡушҡан китабы аша.

Күрше,туған,дуҫығыҙға
Әйбәт булығыҙ тигән,
Өҙөлгән туғанлыҡтарҙа
Яҡынлыҡтар юҡ, тигән.

Яҡшылыҡты яманлыҡтан
Ҡушҡан ул айырырға,
Яман эштән йыраҡ тороп
Яҡшы эштәр ҡылырға.

Балалар - Аллаһ бүләге,
Аңлағыҙ шуны, тигән,
Балаға тәрбиә биреп
Үҫтерегеҙ һеҙ , тигән.

Ҡөръән уҡып табырһығыҙ
Күп һорауға яуапты,
Үҙегеҙгә Аллаһынан
Алырһығыҙ һауапты!

Уҡығыҙ Изге Ҡөръәнде
Йәшәүгә ул ҡулланма,
Мөхәммәт Рәсүлебеҙ аша
Аллаһ биргән юлланма!

Ун дүрт быуат юл үтһә лә
Изге Ҡөръән китабы,
Бер хәреф тә үҙгәрмәгән
Уны һаҡлай Аллабыҙ!

Ҡөръән китабында ята
Ислам дине нигеҙе,
Әҙәп, тәүфиҡ, иман менән
Үтһен кеше ғүмере!



You have read 1 text from Bashkir literature.