Шиирар - Фазил Асланов

  Гьахъсузвал
  Луту угъридиз амадаг,
  Хупӏ кьадачни чеб сад садаг,
  Къалин хьайла ламар рамаг,
  Балкӏандиз чара амай туш.
  
  Амал течир ахмакь балкӏан,
  Ламра буьгьтанламишда кьван,
  Пар чӏугвазвай язух гьайван,
  Ви ашдал къара алай туш.
  
  Гатуз рекье жеда векьин,
  Зулуз кӏунтӏар, марквар кӏватӏин,
  Хъуьтӏуьз дагъдай векьер хкин,
  Ви кардал барка алай туш.
  
  И балкӏан хьиз я бязибур,
  Угърашри ийиз беябур,
  Кӏвалах, зегьмет туш акӏ агъур,
  Дуьньяда куьз гьахъ авай туш.