Аамҭа иазымҵәахыз - 8

Ацәашьеиԥш ианӡыҭуаз…
Урҭ зегь ирылыԥхоз быччаԥшь лаша-лашо,
Шәкы ирылкаан избон…
Адунеиаҿ зегь схашҭыргьы, иарак ауп
исгәалашәо,
Ахы сҭанарԥон!..
***
Ах, уи аӡӷаб, дсылгеит, дсылгеит,
Егьырҭ аӡӷабцәа ираԥылгеит!..
Сышлыцкәашоз, сыхшыҩ сцәылгеит,
Сышлыцкәашоз, сгәы сыцәҭылгеит,
Сызныз амҩагьы санылгеит,
Иахьылҭахыз сымҩахылгеит,
Иҟасҵоз нас, схы сзахымгеит,
Ла илҭахыз акы сзахымԥеит!..
***
Ҳашԥамкәашои, ҳамкәашакәа,
Ҳкәашауеит!..
Ишԥаҳмыршои, иаҳмыршакәа,
Иҳаршауеит!..
Ҳашԥамҽырбои, ҳамҽырбакәа,
Ҳҽырбауеит!..
Аҳәса хәыҷқәа ргәы иамыргакәа,
Ҳаахынҳәуеит!..

***
Аамҭа џьасшьаӡом сара,
Иџьашьатәуп – ауҩы дзаҟрартәыз!..
Ԥшьаала идырцәоит ихәышҭаара,
Иаргьы изгәаҭом дшыԥхасҭартәыз…
Ԥыҭрак ашьҭахь – ҳааизынхар,
Цқьа лакҭала ҳаибадырып…
Иаҳамҟьашьыц аӡә дынхар,
Дцааит дышзахәо, иҽы ҳкәадырып…
Зегьы иџьаҳшьауеит ҳара,
Аха анкылашьа ҳзазхәыцӡом…
Ԥыҭк иаарылыҳәҳәаз ара,
Даҳхәаҽаанӡа ҳааицрыҵӡом!..
***
Сгәырҩақәа зегь цеит исԥырҵны,
Схы сазнрыжьит – шьҭа шәеицыз!
Сеиҭадәықәлеит – ԥыҭк сааиԥхьхәыцны,
Сеиҭаналагеит – сызҿыз!..
Исымоу мҩакоуп, сануп инҵәаанӡа,
Ацәхьаҵрагь сашьҭаӡам уажәшьҭа…
Снеиуеит ус, уи сракәа ԥҵәаанӡа,
Уи амҩаҿ сеиԥхыӡуеит суахҭа!..
АСАСААИРҬАҾ
Ӡӷабк сышә дааины днылагылеит: –
Аҭак сышәҭоу, зҵаарак сымоуп?!
Саргь аԥсуа ишихәҭаз сылԥылеит: –
Бааи аҩныҟа, са саԥшәымоуп!..

Аҭыԥқәа ирышьҭоу, хыхьҟа ихалоу,
Ҳрыламцәажәеит, зынӡа ҳамгәамҵит!..
Аполитикцәа рыхқәа ԥҽуа изыдхало,
Ҳарҭ зынӡа еибашьрада ҳалҵит!..
***
Шьҭа еилыскааит, шьҭа абас ауп ишцатәу,
Мҩак алхны ушнеиуа икәараҵоит…
Иувагылаҵәҟьоугь дызусҭоу, дахьатәу,
Иуимырдырырц, зегь ирҩашьоит, зегь иӡоит…
Уа узызгәаҟуа, мышкызны иуҭаху ҟалоит,
Аха узлак ала иубарыма инагӡаны?!
Ақәа иахнарҟьаргьы, иаурҟаҵозеи, ихкәалоит,
Жәҩан иаанашьҭуеит ацәыкәбарқәа ԥхьаӡаны…
Ари адунеи ду ашәқәа ҟьаҟьаӡа иаанартуеит,
Шьоук злаҭыҵуа, шьоук алаҭалоит иԥжәаны…
Ҳлахьынҵаҵәҟьагь, шьоук амацеиԥш
иаадырҳәуеит,
Ианыҵәҟьоу сеидру, аха ҳнаргалоит ҳжьаны!..

***
Уажәшьҭа егьсыгым анцәа иубома,
Лыгызмалрақәа зегь сҵоит!
Зынӡа ишылҭахым дсызгома,
Аха иамуӡар – дызӡоит!
Ацҳа ихысҵахьазгьы хылхит,
Аӡы иалҭеит маӡала!
Ах, сылмыхәеит, сыԥсы ҭылхит: –
Ухаз еиӷьу ҽак ӡбала!

Ӡбашьа сымам даҽакала,
Зегь са исықәлыжьыр лҭаххеит!
Уи азҵаара аҭак сынтәала,
Илмыӡбарц, днахан илҵәаххьеит!!!
Ах, сызҿу зегь баша хәыцроуп,
Ибзиоу ак ааиуам схаҿы…
Ма дызӡароуп, ма дызӷьычроуп,
Ма снаӡароуп лгәаҿы!
***
Сгәы сызхәыцӡом са саазқәылаз,
Иара цәажәоит аҳәатәала…
Сгәыӷра хәыҷы схьаақәа иргәылаз,
Зынӡак иамоуп икҿацала…
Ах, сумыхәеит аҳәатәхамҵа,
Сургәаҟт уҭӡамцқәа срыдрыӷәӷәала…
Макьана сабылуанаҵ умца,
Ахаангьы унсыжьӡом уара ухала…
***
Адәахьала акгьы убарҭам,
Уажәшьҭа ҳџьаршьом ҳазбауа!..
Мцак ҳацрасуазаргь, ҳшәарҭам,
Уи мчык амам ҳазбылуа!..
Аха аиԥырҵроуп иаҳцәыцәгьо,
Ԥшьаала ианеимаҳхуа ҳнапқәа,
Иаҳцәамбылкәа амца ихәыҵҟьо,
Рыҭра иҳазҭацалом ҳагәқәа!..

***
Ҳаиҭеиԥырҵып, уи шьҭа ҳашьцылеит ҳара,
Ҳагәҭыхақәа еиҭах мчыла иаҳҵәахып.
Иабабҭаху, сара сыхьӡгьы арыххара,
Саԥсамзар акәхап, бара ихыбсауа бнацәхыԥ!..
Амала ибдыруаз, бхаршҭшьа сымаӡам сара,
Бзиа бызбалоит, зегьы ирцәыҵәах маӡала!..
Ахықәахь инеиуама,мшәан, ианҭыҵуа аӡ аҭра?!
Ус бкәаԥ-кәаԥуа бнасыдҵны бцала!..
***
Иџьабшьаргьы, ба бангәаауа бзиа избоит,
Сашьцылацәеит, ирлас-ырлас бгәы аԥжәара…
Бара убасҟангьы, сара сцасазы бҽырбоит,
«Уи слыԥсахуам!» – арахь саҿыхуп ахжьара!..
Уа, ауаарацәа ба бнарылскаарц саннаскьо,
Быхьшьыцба лаԥш наҟ исҟәыбгоит быццакны!
Ах, смышьҭеикит, ах, издыруеит зегь зыхҟьо,
Уаҳа исзымгәаӷьт, уаҳа исзымҳәеит ба бҿаҟны…
Беиҭасыргәаауеит, уажә са сыла ишабо,
Беиҭасԥырҵит, амца бҿықәыҳәҳә бааикәашәан…
Ах, сыгә рыцҳа, уа уоуп исымоу зыгәра зго,
Ҳалҭахызар, уи дхынҳәуеит, зынӡа умшәан!..
***
Усҟәаҵ, исоумҳәан, аамҭа атәы,
Аӷәра аҿырхит,иаҳзынкылом…
Шьоукы ирыздыруам рхатәы,
Амал иарлашәит, иаангылом…
Абас инымҵәандаз ҳҭоурых,
Аҿар ахышьҭыхха иахьӡандаз…

Ҳаԥсадгьыл рыцҳа наҟ иӷәых,
Агәылшьапқәа иаҳцәырымфандаз!
Зынӡак дшәарҭаӡам аӷа,
Иац ҳанихырц иаҳҿагылаз…
Анцәа ду, суҳәоит, ҳаиқәырха,
Ҳалбаармдааит, ҳа ҳтәқәа иаҳхагылаз…
Аӡәгьы измырцәарц ҳхәышҭаара,
Ҳҩарыханы, акәицқәа еихәлаҳҵеит…
Аха аамҭа ақьаад ԥареиԥш ара,
Иаадырҵәин, рџьыба иҭарҵеит!..
***
Иҟаҵатәу рдыруеит,
Ианыҟаҵатәу рдыруеит,
Ишыҟаҵатәу рдыруеит,
Иахьыҟаҵатәу рдыруеит,
Иззыҟаҵатәу уанӡа еиқәхар!..
***
Иацы дшыҟаз иахьа дыҟам,
Лҽылыԥсахуеит есымша!..
Лусураҿ, ма лҩныҟа,
Дышԥаццакуеи, ахыԥша!..
Слыхьӡагәышьап, уи мышкызны,
Исҳәагәышьап, сгәы иҭоу!..
Лара лажәақәа сраԥысны,
Схы лсырдырып, ишсыхәҭоу!..
Аха иџьоушьаша, дыхәмаруеит,
Илызгәамҭоушәа акагьы!..
Баша сҩуеит, баша скәаруеит,
Лкьатеи ԥысҵәоит еиҳагьы!..

Ихааӡа исныруеит ла лыԥхарра,
Аха сеидру уи аҽҳәара?!
Амш аныцәгьо, аӡыӷӷара,
Ушзақәымгәыӷуеиԥш, краамҭа ара!..
***
Нас, абасҵәҟьа ҳаиԥырҵрыма,
Уаҳа иаҳзеиламкәа акагьы…
Ҳагәқәа ирҭаҵәҟьам ҳхәыцрыма,
Хьаак ҳамамшәа зынӡагьы…
Нас, ҳагәхҭыхақәа ҳҵәахрыма,
Еиҭа ҳӡарыма ҳашбылуа…
Ҳус ҳаиҭашьҭаз хымаԥсыма,
Иҳамбоушәа аамҭагьы шцауа…
Нас, ҳа ҳанасыԥ ҳзыԥшрыма,
Амҵәыжәҩа шамоу, ишԥыруа
Ҳзымдырӡоушәа, иҳаршарыма,
Иарбан махәу изықәтәауа?!

***
Уи ииҳәо акәӡам иззыӡҩртәу ара,
Иимҳәо ауп акрызҵазкуа!..
Ижәдыруаз, даҟәыҵӡом макьана аҽхәара,
Дцәырымҵкәа аӷьараҳәа даҿазкуа!..
Ианигәаԥхо аамҭа убас ирхәашьуеит,
Аӡыҵәҟьагьы амца ацреиҵоит!..
Ииҭаху ирхаан ихы наишьышьуеит,
Ииҭахым, хылаҵәҟьа дҭеиҵоит!..
Уи игәра згаз зегь ԥшуп итәаны,
Аӡы шыцәаз ирбазшәа ираҳаҭуп!..

Иманшәаламхеит ҵыԥх, аха сынтәагьы,
Ишамуз жәбоит, шәшаҳаҭуп!..
Макьана дымцәырҵыц иаҳҳәо заҳауа,
Макьана ҽа ԥыҭрак ҳаԥшыроуп…
Ах, аԥсабара, зегь зычҳауа,
Ҳаграқәа мааԥшырцаз, ушәҭыроуп!..
***
Илҭахӡамызт, илҭахӡамызт, илҭахӡамызт,
Акы дхьанарԥшит мчыла сара сахь!..
Иԥшӡаӡамызт, иԥшӡаӡамызт, иԥшӡаӡамызт,
Слымбазшәа наҟ лҿыналхар убрахь…
Ихараӡамызт, ихараӡамызт, ихараӡамызт,
Шьаҿак ааҟалҵан са суадаҿы днаӡеит!..
Иԥхаӡамызт, иԥхаӡамызт, иԥхаӡамызт,
Аха ҳҩыџьагь ҳааицҩналан, иаҳрыԥхеит!..
***
Ииашан аамҭа цеит иаҳԥырҵны,
Ҳхы иаҳзамырхәеит, нас иахарои?!
Ихианы иҳамамызт зегь хәыцны,
Шьоук анҭало, шьоук злахалои?!
Ҳҿызхуа акыҟоуп, уи ҳазгәаҭар,
Иреиӷьу мҩак зегь ҳаицанылар…
Ижәҩа аанкылан ахықә зҽазҭаз,
Аамҭа бзиак шьҭа ҳаԥылар…
Амал мыцхә згазгьы идырхынҳәыроуп,
Ажәлар иртәу дара ирзынхааит…
Ацәгьа зузгьы иҿы мааҳәыроуп,
Аиаша акоуп, убриала инхааит!..

Наҟ ҳарҟәаҵып иаиааиуеи, еиҵааиуеи,
Ҳаламс еиҳау партиас иҟои?!
Иԥхашьазаргь, аамҭа еиҭааиуеит,
Уи амаҳә бзиа еиԥш, иныҟәоит!..
***
– Ианбыкәу аиаша атәы ианаго,
Ауаа аԥсҭазаараҵәҟьа анроуа?!
– Аӡә дысурбозар уажә имлаго,
Урзымӡҩрын, урҭ зажәа зроууа!..
– Ианбыкәу ҳажәлар цқьа ианыҿио,
Аԥсуа ила Аԥсны ҭәыроуп!..
– Цқьа ирхиарц аԥхьарца азырҳәо,
Иара ианиҭаху иуркыроуп!..
– Ианбыкәу ҳаԥсшәа ԥхамшьо ара,
Зегьы еицырҳәо ианыҟалаша?
– Убригь иамоуп ара аҽҳәара,
Мышкызны иишт ицқьаны изҳәаша!..
– Ианбыкәу ҳажәлар аӡәыкны инхо,
Хәыҷи-дуи еихӡыӡо ианаабо?!
– Иҟалап ирацәамзар ус изгәаԥхо,
Цқьа урылаԥши урҭ анаатәо!..
– Шьҭа араҟа аӷәра рыххатәуп,
Ианамуы, аԥшәма иажәа иҳәароуп!..
Ари адгьыл ахаангьы аԥсуа итәуп,
Ари адгьыл ахаангьы уи изынхароуп!..
***
Урҭ аҩыџьагь еиҩырго акагь ыҟам,
Абаз кылҵәак иаԥсам иаахҵәаны!..

Аха аԥсышәак раҳәатәуп адәныҟа,
Ушҟа иааушьҭыртә иҟам иааигәаны!..
Урҭ аҩыџьагь ӷәӷәала убас ишьыцуеит,
Есымша иркуп ирхианы ҵәык…
Маҷк уаареиӷьхар, аԥсшәаҳәара иаҟәыҵуеит,
Ма ҵәыцак иашьҭоуп, ма ицаҳәцаҳәо рҵәык…
Урҭ аҩыџьа ажәа ԥшӡа рцәыбналеит,
Имааибит, иааибраҳа бгеи уасеи!
Уи адәыԥшӡа иқәырхуеи, ирзалеи,
Абна илиааз расоушәа, изрыссеи?!
Урҭ аҩыџьагь аахәлаанӡа иуазыруеит,
Дара шуаадуқәоу рызгәамҭаӡеит аӡәгьы!..
Рхала ианаанхо, акгьы ишаанамго рдыруеит,
Аха иааицылар, нас дрыхәаӡом уаҩгьы!..
***
Егьа ибҵәахыргьы, былаԥш саԥшаауеит сара,
Бгәеисыбжь ааиҩуеит ацәқәырԥеиԥш,
аҭҳара-ҭҳара:
«Ус усцәымӡын, ус умгылан хара-хара,
Шьҭа ҳаизааигәахап, шьҭа ҳаилаҵәаҵәҟьап
ҳара!..»
Арахь, иҳацрымшәо ҳара иҳашьҭоуп ҳахҭакы,
Аҵәыршқәа реиԥшҵәҟьа, ҳкылзыблаауа
шәыблакы!..
Урҭ ҳарцәызыхьчо, урҭ ҳахьырымбо ҳазцар,
Ҳаҽрылаҳӡап, ашәа ахьырҳәауа аҵар!..
Ах, са саҟра иахӡыӡаауада уи ҳгәы иҭоу,
Ба санбԥырҵуа, ибымбар еиӷьуп ислакҭоу…
Зны ирыцҳасшьоит, уи акәара хәыҷ аӡӷьахь ицо,

Зны саҵашьыцуеит, ишыздыруагьы
иалахьынҵо!..
***
Аиаша здыруаз ирҵәахит, ирымҳәаӡеит,
Ҳара ҳалаԥш урҭ рҟынӡа имнаӡеит…
Шьоукгьы ражәа иахьынӡахәҭаз ирымраӡеит,
Амцгьы ԥшуазма, амҩа ылнахт, имтәаӡеит,
Аиашеи иареи еивагылеит, шьҭа еихьӡеит,
Иааузымдырыртә, дара аҩбагь еиԥшхаӡеит,
Аиаша рыцҳа, баша алуқәа хаӡеит,
Еибафаӡаанӡа, уи абжьыҵәҟьа рмаҳаӡеит,
Шьҭа ҳааигәа иааиуам, иаҳцәыбналеит,
ирҳаӡеит!..
***
Ҳаибамбеижьҭеи акрааҵуан ҳара,
Ҳазлааии иахьанӡа ичҳаны?!
Са сашьҭамызт ахьӡ арҳара,
Бцәырҵуамызт баргьы быԥхашьаны…
Уажә ҳаиԥырҵра даара ицәгьахашт,
Иҳамбаӡакәан еилаҵәеит ҳагәқәа…
Шьҭа аҩныҟагьы амҩақәа бхаршҭ,
Бдәықәлеит ҳәа башьҭуам ақәа!..
Бсымбароуп зынӡакгьы бӡыҭуа,
Ачамгәыр еиԥш, игәхьаазгоит быбжьы!
Арбаӷьқәа аккаҳәа иҿыҭуа,
Ианааиларԥсо, ҳарԥылап шьыжьы!..
***
Хәыҷы-хәыҷла аиаша наскьоит,
Ҳазҭамԥшӡакәа уаҳа алакҭа,

Лаԥшык, аҟамчеиԥш иҳахҟьоит,
Иаҳцәыӡыр ҳәа ишәоит ҳгәыӷырҭа…
Наҟ хықәуп, аԥсык инаҿҟьар,
Абаҩҷагьы убом, ҳаӷеиҭа…
Знык иалшан амҵәыжәҩақәа аҟьар,
Ишеиқәхаз ҳнарбар ахаҭа?..
Уи ыҟан, уи ииаст, ицеит,
Ахааназ ихашҭуам избаз…
Уи амацәыс еиԥшуп, иқшеит,
Еиқәхашьагьы иоуам изынҟьаз!..
***
Санлаҩсуазгьы игәасҭеит, дхәацыхәаԥшьха
дгылан,
Аарлаҳәа лхы лырҵысит…
Саргь хьаас дыскцәамшәа ԥшьаала сҽынкылан,
Ус сшылзыԥшыз акыр ҵит!..
Арахь дзызхәыцуа са соуп уаха аашаанӡа,
Саргьы сзызхәыцуа ла лоуп!..
Ус ауп есымша, знык ҳааибабаанӡа,
Ҳанеибаба, нас зегь мцуроуп!!!
***
Илҳәоз саҳаанӡа цқьа агәра сымгеит,
Лыблақәа есымша сыржьон…
Лалахь сназгоз сыцҳа ҭабгеит,
Сагәылахеит аҵых цхыбжьон…
Иџьаушьаша, акызаҵәык хьаасгьы илкуам,
Иабалҭаху са сызбылуа!..
Арахь зегь лбахуеит, лыбла алыркуам,
Сасакәушәа зыгәра лгауа!..

Дгәыԥжәагахан дцәырҵит уи доумаха,
Лара лҿаԥхьа амзаҵәҟьагь ҭаан!..
Илҳәоз смаҳар акәын еиӷьыз уаха,
Лыблақәа рымц еиҳа ихаан!..
***
Абаҳчеиԥш, сгәы дыҵалан днеиуеит лара,
Ашәҭқәа хкы-хкыла илыҟәшәоит!..
Сыблақәа лхымшәо ишлыцугь убра,
Уажәы-уажә дысцәыӡыр ҳәа сшәоит!..
Уи лымҩа шнымҵәо здыруеит зынӡа,
Сгәы усгьы, Аԥсны аҵкысгьы иҭбаауп!
Аха зны-зынла шәарҭарак цәырҵуеит маӡа,
Сеидру, аԥсы мыжда ҵаауп!
***
Макьанагь думбацызт ус зыгәра уго,
Аӡәы лҟынтәигь иумоуцызт ныӡбак…
Ицәырҵуеит цәаныррак ушьҭырԥраан узго,
Улаԥш налылашәкәоит ԥҳәызбак!..
Улышьҭоуп аахәлаанӡа аҳәынҵәа шьаҟьаны,
Адунеи зегь ухаршҭны, уҽкынҵо…
Ухаҵоуп, игәаҭа лымҵәыжәҩа ҟьаны,
Аҷыҭбжь умырҳакәа духыԥраан дышцо!
***
– Шәа ишәыгугьы здыруеит, ишәыбзоугьы
здыруеит,
Зегь ӡбашьак шрысҭо агәра жәга!
Ажәлар ианышәҭахха, сҽыццышә
шәкәадыруеит,
Саанымкылакәа сдәықәлап, шәыҭга!..

– Мшәан, баша имыӡбазаап, алхрақәа зхәыцыз,
Уареи ҳареи аҵааршә ҳабжьан!..
Цқьа уҳаздыруамызт, уажәоуп уанцәырҵыз,
Акызаҵәык ҳазлауҳәо – ҳумжьан!..
***
Зегь зхаану, зегь збахьоу,
Ажәҩан ԥшьаала иаҳхагылоуп…
Аиаша акагмыжькәа изҳәахьоу,
Амц, агәаӷьеиԥш агәҭа иагәылоуп…
Шьоук урҭ харгалон ҵәҩанҵәы: –
«Арҭ уаҩ дрыхәом, аума ргәыжәлоуп!..»
Аха ицеит амшқәа, иахьа, уаҵәы,
Аӡ иагаз ацҳаиԥш, нырцә ихыжьлоуп!..
***
Ҳиԥырҵыр рҭахӡамызт ауха ба быблақәа,
Маӡала ԥшьаала игәырҩон…
«Усҵәҟьа ҳашәхашәмрышҭын, зны-зынла
шәнықәлақәа!» –
Иналабҳәеит аҵых цхыбжьон…
Уи акәхеит, шәымҭакгьы уаҳа имырҵыкәа,
Бҿаԥхьа сышкаԥаз ббоит!..
Быблақәа роуп зегь зхароу, бмыгәӡыкәа,
Сцар, агәырҩа исцәагоит!
***
Сааит, сара сцашьа Анцәа итәуп изеиԥшрахаша,
Аха иԥшӡазар сҭахуп…
Ажәаз шәымӡышо, шәара акырӡа ишәызхаша,
Сгәаҿы иҵәахуп…

Уи хәшәуп, ихәрыбӷьыцуп, шәа шәыхәрақәа
ирықәшәҵар,
Иаразнак иӷьоит…
Шәгәы иҭалаз шәа ишәтәуп, аха ирыцҳауп
иҭышәцар,
Еиқәшәырхар, ишәҭынхоит…
***
Уи дызусҭоу аӡәгьы издырӡом,
Уи дмаӡоуп…
Уи дахьыҟоу аӡәгьы дзырӡом,
Хараӡоуп…
Уи иҵыхәа зларсым арбан,
Аха иузкуам!..
Рҿанынархо, иара даагәаҭан,
Дазцоит агәам!..
Уи дырзылгом, далаӷьазшәа,
Дырзырҵысуам!
Агәам малны далахазшәа,
Иԥсы ҭәуам!..
***
Иџьаушьаргьы ауеит,
Абриаҟара изыхарои ҳәа!
Есымша аӡбахә ҳҳәауеит,
Иабаҟоу, инзырхои ҳәа!..
Иаашәычҳар, ишәзаауеит,
Уи шьҭа аныҟәашьа аҵозаап!..
Шьоукы ирыбжьауеит,
Ҽа шьоукы иныҟәырцозаап!..

Ах, ҳгәы ахшәеит, иаҳҭахым,
Зегь ахьгылоу иҳәҳәозаап!..
Анап иашьцылаз аиаша,
Ҳара иҳахәом, рҳәозаап!..
***
Ҳаӷоу ихигааит ари амш шысхызгаз,
Сҩыза дцәажәон игәы ҭыӷьӷьа!..
Сгәаҵа иҭаршәны исымаз ԥҳәызбак,
Лыччаԥшь сцәылҵәахит иахьа!..
Са сзықәшәаз ауп уаҩ изхымго,
Сҩыза маҷк игәы ҟасҵеит!..
Ӡӷабк дышхысххьазгьы, дысзымго,
Сшынаԥшааԥшуаз, хаҵа дцеит!..